Добры вечар! Судовы канвэер у Сінявокай працуе далей. Сёньня судзяць 11 ашмянскіх мытнікаў. Усяго па абвінавачаньнях у атрыманьні хабараў маюць праходзіць 58 мытнікаў у 4 справах.
МАЛАДАФРОНТАЎЦЫ ПРЫСЯГНУЦЬ У МЯСЬЦІНАХ СЛУЧЧАКОЎ. З нагоды 96-й гадавіны Слуцкага паўстаньня актывісты «Маладога фронту» ладзяць падарожжа па баявых мясьцінах, якое скончыцца ганароваю прысягаю маладафронтаўцаў.
ЗА «ФРОД» БЕЛАРУСЬ НЕ АДКАЗВАЕ. Наша расьсьледаваньне на тэму: Што рабіць, калі тэлефанаваньні ў Беларусь з-за мяжы даходзяць не да патрэбнага абанэнта, а да незнаёмых людзей, якія просяць проста пачакаць, пакуль паклічуць да слухаўкі знаёмага? Міністэрства сувязі адказвае, што такія выпадкі злучэньня з махлярамі (завецца гэтая нячыстая справа «фродам») адбываюцца зь віны замежных апэратараў сувязі. У Беларусі ўся сувязь, так сказаць, чыстая і пад кантролем. Значыць, тэлефануючы з-за мяжы ў Беларусь найлепш махнуць рукой на традыцыйныя спосабы тэлефанічнай сувязі і карыстацца аплікацыямі Skype, Viber, Facebook Messenger.
ПАЭТУ-ЗМАГАРУ 85. «У Беларусі паэт — зьява яшчэ большая, чым паэт у Расеі. [Там] не існуе праблемы мовы, праблемы гістарычнай памяці, праблемы палітычнай незалежнасьці краіны. А перад беларускім паэтам усе гэтыя праблемы рэальна паўстаюць. Таму ён, апрача ўсяго, павінен быць патрыётам і змагаром за Беларусь» – сказаў 85-гадовы Анатоль Вярцінскі нашаму калегу Міхасю Скоблу.
«ПРЫГОЖАЯ ПОЛЬСКАЯ ПАНЕНКА». 17 лістапада ў Прэс-клюбе ў Менску адбылася прэзэнтацыя кнігі «Насыпаць горы» польскай аўтаркі Малгажаты Шэйнэрт у перакладзе на беларускую мову. Кніга распавядае пра прамінулае Палесьсе, дзе поруч жылі беларусы, палякі, літоўцы, украінцы, габрэі, а таксама тутэйшыя — палешукі. «Я вельмі люблю Малгажату. Для мяне яна ўвасабляе вобраз Польшчы. Такая прыгожая польская паненка. У ёй грацыя, мяккасьць тону, спакойны позірк. Гледзячы на яе, я разумею, што я — з агрэсыўнай культуры» – сказала прысутная на прэзэнтацыя нобэлеўская ляўрэатка Сьвятлана Алексіевіч, дорачы аўтарцы кветкі.
