Такое рашэньне найвышэйшы орган арганізацыі прыняў на паседжаньні 5 лютага.
Пра магчымасьць абʼяднаньня двух саюзаў інфармавала польская прэса. Штодзёнка "Rzeczpospolita" паведамляла, што ўрады Беларусі і Польшчы распрацавалі закулісны сцэнар урэгуляваньня праблемы польскай меншасьці. Паводле газэты, абʼяднаць абедзьве арганізацыі плянуецца пад адной назвай. Пасьля гэтага, нібыта, яна б працавала згодна зь беларускім заканадаўствам.
Пасьля доўгага абмеркаваньня чальцы Галоўнай рады СПБ выказалі рашучы пратэст супраць апісаных у СМІ плянаў, паведамляе сайт znadniemna.pl. У звароце арганізацыі праўладны СПБ называецца «марыянэткавым».
Чальцы Галоўнай рады просяць афіцыйную Варшаву не пагаджацца са сцэнаром абʼяднаньня і адзіным шляхам урэгуляваньня сытуацыі называюць прамыя перамовы кіраўніцтва СПБ зь беларускім урадам.
Праблемы Саюзу палякаў Беларусі пачаліся пасьля VI Зьезду ў 2005 годзе. Улады анулявалі выбар на старшыню арганізацыі Анжалікі Борыс. Ад таго часу арганізацыя дзейнічае напаўпадпольна.
