Вядоўца ранішніх навінаў філядэльфійскага тэлеканалу 6 ABC Мэт О’Донэл адказаў у твітэры на пытаньне гледача пра яго ўлюбёныя мэтал-альбомы ў 2016 годзе.
Ён назваў ня ўласна альбомы, а выканаўцаў: Re1ikt (Беларусь), Sivyj Yar (Расея), Trautonist (Нямеччына) і Cobalt (ЗША). Беларускі гурт не выдаваў альбомаў у 2016 годзе, але выдаў «Лекавыя травы» ў кастрычніку 2015 году.
У «Лекавых травах» гурт выканаў у мэтал-стылістыцы песьні зь беларускага Палесься і іншых рэгіёнаў краіны, а таксама песьні па творах Яна Баршчэўскага і Якуба Коласа. Альбом атрымаў шэраг узнагародаў у Беларусі, у тым ліку «Найлепшы рок-альбом», «Прыз народных экспэртаў» і «Прыз штатных экспэртаў» ад Experty.by, «Альбом году» на фэсьце «Даём рады» і на прэміі Rock Profi (на ёй жа Re1ikt быў названы гуртом году).
Найбліжэйшы выступ Re1ikt адбудзецца на фольк-фэсьце «Камяніца» ў Музэі народнай архітэктуры і побыту пад Менскам 10 верасьня.
