Спадарыня Сьвятлана жыве ў Манака, прыехала ў Ніцу да сына, які навучаецца там, на сьвяткаваньне нацыянальнага сьвята Францыі 14 ліпеня.
Яна не была сьведкам тэракту і не наважваецца пра яго расказваць: пакуль мала чаго вядома. Але, знаходзячыся проста на вуліцы ў Ніцы, прайшоўшы праз порт і прамэнад, яна кажа Свабодзе пра цяперашнюю сытуацыю:
«Пакуль ніхто нічога ня ведае і ня можа сказаць пра здарэньне. Проста жах і ўсё. Але цяпер сытуацыя цалкам спакойная і годная. Усе гуляюць, ходзяць-бегаюць, як звычайна ў Ніцы, займаюцца спортам, п’юць каву. Нават больш, чым спакойна — спадзяюся, гэта не зацішша перад навальніцай, але думаю, усё будзе добра.
У паліцыі дастаткова добра вышкалены пэрсанал. Фэйс-кантроль праходзяць усе і паўсюль, але нейкіх адмысловых блёкпастоў няма, гэта робіцца, я думаю, проста пунктамі. Нічога надзвычайнага не адбываецца, спэцслужбы, паліцыя і вайсковая паліцыя ведаюць сваю справу.
Усе мае знаёмыя і сябры жывыя, усе адно аднаго знайшлі за ноч. На прамэнадзе адкрыліся ўсе гатэлі і рэстарацыі, нехта там перачакаў, нехта далей ішоў. Усе былі вельмі згуртаваныя, дапамагалі адно аднаму».
***
Ніцы грузавік тараніў натоўпы людзей: 84 ахвяры тэракту
Позна ўвечары 14 ліпеня грузавы аўтамабіль заехаў у натоўп людзей падчас сьвяткаваньня Нацыянальнага сьвята Францыі ў Ніцы. Паводле паліцыі, загінулі як найменей 84 чалавекі. Прычына здарэньня пакуль невядомая, прэзыдэнт Францыі гаворыць пра «тэрарыстычную прыроду атакі». Беларускі МЗС пакуль на падзею ніяк не рэагуе, пра беларусаў сярод ахвяраў пакуль не паведамляецца.
