Самую вялікую колькасьць прэтэндэнтаў на кандыдата ў дэпутаты Палаты прадстаўнікоў мае ЛДПБ — яна «закрые» ўсе 110 акругаў. Правацэнтрысцкія палітычныя сілы аб’ядналіся ў кааліцыю — у іхнім сьпісе 93 чалавекі. Партыя БНФ — на трэцім месцы, у яе 72 вылучэнцы.
Рух «За свабоду» — актыўны ўдзел безь Мілінкевіча
Зьвестак пра ўдзел у выбарах лідэра руху Аляксандра Мілінкевіча няма. Але вылучаецца яго намесьнік — Юрась Губарэвіч. Працаваць з выбарнікамі ён будзе ў Менску, у 108-й Каліноўскай акрузе, паводле нарэзкі, якая была зробленая ў 2014 годзе.
«Мы плянуем браць актыўны ўдзел у выбарах. Мы ўвайшлі ў Правацэнтрысцкую кааліцыю, у якой апроч нас — АГП і Аргкамітэт па стварэньні БХД. На сёньня кааліцыя выстаўляе 93 кандыдаты», — кажа Губарэвіч.
БХД — лідэры ўвойдуць у ініцыятыўныя групы, каб дапамагчы маладым палітыкам
Лідэры арганізацыі Павал Севярынец і Віталь Рымашэўскі асабіста ў якасьці кандыдатаў удзельнічаць у выбарах ня будуць. Яны лічаць, што прынясуць больш карысьці, калі цягам кампаніі падтрымаюць вылучэнцаў ад БХД.
Усяго ад Беларускай хрысьціянскай дэмакратыі ідзе каля 30 чалавек.
«Гэтая кампанія для нас — спосаб змаганьня за свабодныя і справядлівыя выбары ў Беларусі. Відавочна, што Лукашэнка і Ярмошына будуць іх фальсыфікаваць. І моцныя кандыдаты ад БХД — а я перакананы, што хрысьціянскія дэмакраты не ўваходзяць ва ўзгоднены з КДБ сьпіс апазыцыянэраў, якіх, магчыма, возьмуць у парлямэнт, — могуць перашкодзіць рэжыму легалізаваць гэтыя выбары», — кажа Рымашэўскі.
Свой няўдзел палітык тлумачыць так:
«Я ня буду вылучацца, таму што хачу скарыстаць магчымасьць дапамагчы ўсім нашым кандыдатам ад БХД. Буду ўваходзіць у іх ініцыятыўныя групы, сустракацца зь людзьмі ў рэгіёнах. Сярод нашых вылучэнцаў шмат маладых людзей, для якіх гэта першыя выбары і якіх трэба падтрымаць».
АГП яшчэ вырашае, удзельнічаць ці ляжаць
АГП 8 чэрвеня на паседжаньні Палітрады павінна вызначыцца з фарматам удзелу ў парлямэнцкіх выбарах.
«Сёньняшняя Палiтрада АГП павінна расставіць усе знакі прыпынку ў сказе «ўдзельнічаць нельга ляжаць», — піша ў Фэйсбук Анатоль Лябедзька.
Усяго ў парадку дня Палітрады 10 пытаньняў, сярод якіх распрацоўка рэкамэндацыяў для выбарнікаў наконт таго, што рабіць у дзень выбараў, і вызначэньне парадку вылучэньня ў акруговыя камісіі.
БНФ — актыўны ўдзел кіраўніцтва і актывістаў
У сьпісе прэтэндэнтаў у кандыдаты ў дэпутаты ад БНФ 72 чалавекі, якія будуць вылучацца як мэтадам «ад партыі», так і праз збор подпісаў. У канцы траўня партыя апублікавала выбарчую плятформу «Для Беларусаў», якая складаецца з 19 пунктаў.
Лідэр БНФ Аляксей Янукевіч традыцыйна вылучаецца ў Чыжоўцы — гэта будзе яго чацьвёртая парлямэнцкая кампанія. Палітык мае намер правесьці збор подпісаў (для вылучэньня неабходна сабраць 1000), каб скарыстаць магчымасьць паразмаўляць з жыхарамі раёну.
Таксама вылучаюцца яшчэ два прадстаўнікі кіраўніцтва Партыі БНФ — гэта намесьнікі старшыні Рыгор Кастусёў і Вольга Лагвіновіч.
«Гавары праўду» — ідзе зьбіраць подпісы, а пасьля — у парлямэнт
Лідэры грамадзянскай кампаніі «Гавары праўду» Андрэй Дзьмітрыеў і Тацяна Караткевіч ужо афіцыйна абвясьцілі, што будуць вылучаць свае кандыдатуры на выбарах у Палату прадстаўнікоў.
«Я прыняў рашэньне ўдзельнічаць у гэтых выбарах і прайсьці ў парлямэнт. Для таго, каб у парлямэнце была альтэрнатыва і гучаў голас грамадзян. Парлямэнту трэба вярнуць яго сапраўдную ролю — прадстаўляць грамадзян, а не чыноўнікаў», — так абвясьціў пра свой намер Андрэй Дзьмітрыеў, які будзе вылучацца ў Дзяржынску.
Дзе будзе вылучацца Тацяна Караткевіч, пакуль невядома. Хутчэй за ўсё, яна будзе зьбіраць подпісы ў некалькіх акругах, а пасьля вырашыць, у якой зь іх падаваць подпісы на праверку.
«Мы ўсе вылучаемся шляхам збору подпісаў. Магчымасьці партыйнага вылучэньня ў нас няма. Цяпер гатовыя да ўдзелу 35 чалавек — яны маюць прайсьці няпросты этап збору подпісаў. Зь іншага боку, калі чалавек сабраў подпісы, то гэта зусім іншы ўзровень легітымацыі кандыдата, чым калі ён вылучыўся праз рашэньне партыйнага органа», — кажа Дзьмітрыеў.
БСДП (Грамада) — удзельнічае, але «без апэтыту»
Партыя выстаўляе больш за 30 прэтэндэнтаў на кандыдацтва.
«Я ня веру ў празрыстасьць, адэкватнасьць і адкрытасьць выбараў, таму вялікага апэтыту і цікавасьці ў мяне няма. Апэтыт гэты бывае тады, калі ты ўпэўнены, што падлік будзе празрысты. Але ў нас усё вельмі закрыта», — кажа кіраўніца БСДП(Г) Ірына Вештард.
Яна дадае, што, нягледзячы на закрытасьць выбараў, яна ў іх удзельнічаць зьбіраецца:
«Трэба, каб беларусы ведалі, што адбываецца ў краіне, каб ведалі палітычныя структуры, у тым ліку і нашу партыю, каб гарнуліся да нас. А для гэтага неабходна ўдзельнічаць у палітычных падзеях. Я не выключаю і сябе зь ліку нашых вылучэнцаў, але фармат удзелу мы яшчэ мусім абмеркаваць».
ЛДПБ — «25% вылучэнцаў — жанчыны, сярод якіх такія, што хоць на фатасэсію»
Гэтая палітычная структура будзе вылучаць сваіх прадстаўнікоў на ўсіх 110 акругах. Як адзначыў яе лідэр Сяргей Гайдукевіч, сёлета ў межах ЛДПБ вялікая канкурэнцыя — на некаторыя акругі прэтэндуюць па тры асобы.
«Мы вельмі дасьведчаная партыя, да выбараў рыхтуемся ўжо цэлы год, закрываем усе акругі. У нас высокія патрабаваньні да вылучэнцаў — вышэйшая адукацыя, месца працы. Гэтым разам шмат моладзі хоча вылучацца, сярод якой даволі многа жанчын. Не магу не пахваліцца нашымі дзяўчатамі — прыгажуні. А тры ёсьць такія, што хоць заўтра на фатасэсію».
Сяргей Гайдукевіч пакуль ня можа назваць акругу, дзе будзе вылучацца ён сам — гэтае пытаньне мае разгледзець ЦК партыі.
«Справядлівы сьвет» — удзельнічае, бо не прымае ідэі байкоту
Сяргей Калякін пакуль вагаецца паміж дзьвюма акругамі — адна ў Менску, другая ў рэгіёне. Але ў сваім актыўным удзеле не сумняецца:
«Безумоўна, я буду ўдзельнічаць. І таксама будзе ўдзельнічаць партыя — мяркуем вылучыць кандыдатаў на 63 акругах. Удзельнічаем таму, што выбары — гэта нават ва ўмовах Беларусі добрая магчымасьць працаваць зь людзьмі, распаўсюджваць сваю пазыцыю пра тое, што адбываецца ў краіне, агучваць нашы прапановы, шукаць новых прыхільнікаў. Увогуле нашая партыя ніколі не падтрымлівала ідэю байкоту», — кажа Сяргей Калякін.
Разам з тым палітык кажа, што разьлічваць на дэпутацкі мандат не выпадае — на яго думку, у Беларусі ня лічаць галасы на выбарах.
