Прэзыдэнт Украіны Пятро Парашэнка заявіў, што Ўкраіна «ніколі не прызнае ні судзілішча над Надзеяй Саўчанкай, ні так званага прысуду».
На сваёй старонцы ў Твітэры і ў відэазвароце, апублікаваным на прэзыдэнцкім сайце, Пятро Парашэнка нагадаў, што прэзыдэнт Расеі Ўладзімір Пуцін у часе сустрэч у Нармандзкім фармаце абяцаў вярнуць Надзею Саўчанку ва Ўкраіну. Прэзыдэнт Украіны выказаў меркаваньне, што надышоў момант выканаць абяцанку. У сваю чаргу Парашэнка заявіў пра сваю гатоўнасьць перадаць Расеі двух расейскіх вайскоўцаў, затрыманых за ўдзел ва ўзброенай агрэсіі супраць Украіны.
«Судовае разбіральніцтва іх спраў знаходзіцца на фінальнай стадыі. Адразу пасля іх завяршэньня я гатовы шляхам адпаведных працэдур забясьпечыць іх выезд у РФ. Такі падыход адпавядае пункту шэсьць Менскіх дамоўленасьцяў — аб абмене ўсіх на ўсіх. І гэта павінна быць зроблена неадкладна», — заявіў Парашэнка ў відэазвароце.
У Кіеве працягваецца разгляд справы расейскіх вайскоўцаў Яўгена Ярафеева і Аляксандра Аляксандрава, затрыманых на Данбасе леташняй вясной.
