«Азнаямляльна-пачатковы курс беларускай мовы для японцаў» выдадзены ў цэнтры замежных моваў Цукубскага ўнівэрсытэту (Японія).
Пра гэта на сваёй старонцы ў Фэйсбуку паведаміла вядомая многім беларусам беларускамоўная японка Сіёры Кіёсава.
Падручнік складзены на аснове распрацаваных матэрыялаў па прадмеце «Славянскія мовы і культуры», які выкладаўся на факультэце гуманітарных навук Цукубскага ўнівэрсытэту ў 2015 г. Падручнік упершыню ў Японіі падрыхтаваны ў адпаведнасьці з новай рэдакцыяй беларускага правапісу, які быў прыняты ў 2008 г.
«Увогуле кніга зьяўляецца, відаць, першым практычным падручнікам пачатковага курсу беларускай мовы ў Японіі, — піша Сіёры Кіёсава. — Пры выданьні гэтага падручніка неацэнную дапамогу аказалі мне мае паважаныя настаўнікі зь Японіі і Беларусі: прафэсар Тасінобу Усуяма (прафэсар Цукубскага ўніверсітэту, рэдактар кнігі) і спадарыня Тацьцяна Рамза (дацэнт БДУ, сааўтар кнігі). Хацелася б шчыра падзякаваць гэтым маім паважаным настаўнікам у Японіі і Беларусі, якія заўсёды падтрымліваюць мяне ў маіх пачынаньнях. А таксама я вельмі ўдзячная тым людзям, са знаёмства зь якімі пачалося маё вывучэньне беларускай мовы», цытуе японку «Наша ніва».
«Падручнік атрымаў цудоўную назву „Спрабуйма!“. Спадзяюся, што гэтая першая „спроба“ вывучэньня беларускай мовы кожным зацікаўленым японскім чытачом перарасьце надалей у глыбокую цікавасьць да культуры, гісторыі ды іншых разнастайных прывабнасьцей Беларусі», — піша японка Сіёры Кіёсава.
У сябе на Радзіме яна заснавала клюб па вывучэньні беларускай мовы. Навошта японцам вучыць беларускую мову, і ў чым японцы падобныя да беларусаў, Сіёры раней расказвала ў інтэрвію Свабодзе.
