Газэта цэнтральных органаў выканаўчай улады Ўкраіны «Ўрадавы кур’ер» апублікавала рашэньне Міжведамаснай камісіі па міжнародным гандлі, паводле якога на шэраг беларускіх тавараў уводзіцца дадатковае мыта.
Як пішацца ў паведамленьні камісіі, адмысловае мыта ў памеры 39,2% ад мытнага кошту тавару ўводзіцца на шэраг тавараў, якія імпартуюцца зь Беларусі ва Ўкраіну, у сувязі з «выяўленьнем фактаў дыскрымінацыйных і несяброўскіх дзеяньняў з боку Рэспублікі Беларусь адносна законных правоў і інтарэсаў суб’ектаў зьнешнеэканамічнай дзейнасьці Ўкраіны — прадпрыемстваў кандытарскай і піваварнай галінаў».
Рашэньне набудзе сілу 20 студзеня 2016 году. Яго могуць скасаваць, калі Беларусь спыніць «дыскрымінацыйныя і несяброўскія дзеяньні» адносна Ўкраіны.
У лік тавараў, на якія ўводзіцца мыта, трапіла малочная прадукцыя (малако, вяршкі, згушчонка, сыры і іншыя), чорная ікра, цукар і соль, кандытарскія вырабы, шакаляд, хлебабулачныя вырабы, піва і гарэлка, касмэтыка, шампуні, мыйныя сродкі, шыны, тканіны, адзеньне, трактары, мэбля, сурвэткі, каробкі, кошыкі і сядзеньні для ўнітазаў.
Летась Украіна ўжо ўводзіла адмысловае мыта на беларускія лядоўні, шыны, малако, цукеркі, піва і іншыя тавары, пасьля таго як Беларусь увяла ліцэнзаваньне імпарту піва з-за межаў Мытнага саюзу (у які Ўкраіна не ўваходзіць). Пазьней у гэтай «гандлёвай вайне» Беларусь пайшла на саступкі.
