Існуе павер’е, што беларускія спартоўцы дасягнуць небывалых вяршыняў, калі пачнуць выступаць пад нацыянальнымі бел-чырвона-белымі колерамі. Праверыць гэта цяжка, але адэпты ўжо ўхапіліся за першую перамогу футбольнай зборнай за апошнія два з паловай гады: македонцаў адолелі ў новай форме, у патрэбных колерах і са слушным беларускім напісаньнем прозьвішчаў. Іван Шыла склаў свой прыватны рэйтынг спартоўцаў, клюбаў і ініцыятываў беларускіх па зьмесьце, а ня толькі форме.
Віталь Гуркоў
Гуркоў даўно вядомы сымпатыямі да беларушчыны: дзевяціразовы чэмпіён сьвету па тайскім боксе дае інтэрвію па-беларуску, удзельнічае ў стварэньні ролікаў для кампаніі «Будзьма», носіць вопратку з вершнікам на кані ад нашага брэнду LSTR, а ад верасьня яшчэ і сьпявае ў гурце «Brutto». І заўважце, усе песьні, якія ён выконвае, — беларускамоўныя.
Што важна, Гуркоў не адзіны з беларускіх барцоў, якія выяўляюць сымпатыю да беларускай мовы і культуры, але ён, відаць, вядзе рэй і задаў гэты трэнд.
Фрагмэнт кліпа
Суьсветна вядомы беларускі тайбаксер Дзмітрый Валент на турніры Topking World Series выйшаў біцца ў рынг у вышыванцы LSTRаўскай вытворчасьці і эфэктным левым адправіў у накаўт — паведаміла супольнасьць LSTR Adzieńnie на сваім акаўнце ў фэсбуку
Віталь Радзівонаў
Пачалося ўсё зь некалькіх беларускамоўных ролікаў, а сёлета нападаючы зборнай па футболу адкрыта кажа, што беларусы павінны сьвяткаваць Дзень Волі. І канечне, вядзе па-беларуску фэйсбук, мае белмоўны надпіс на буцах, у інтэрв’ю «Свабодзе» гаворыць пра моду на родную мову і выступае адным з арганізатараў «Мова-Cup», які прайшоў мінулай восеньню ў Менску.
Аляксандра Герасіменя
На фота побач з Радзівонавым, менавіта яна. Беларуская плыўчыха, двойчы срэбраная прызёрка Лёнданскіх алімпійскіх гульняў, таксама была адной з арганізатарак Мова-Cup. Яшчэ яна раіць сваім заўзятарам чытаць Быкава і прызнаецца ў тым, што «эстэтычна ёй бліжэй бел-чырвона-белы сьцяг». Прычым, заваўжце, робіць гэта яна ў 2012, калі нават пра кансэнсус наконт нацыянальнага арнамэнту на майках гаворкі не было.
А зусім нядаўна Аляксандра заваявала два мэдалі на чэмпіянаце па плаваньні ў Гішпаніі. Адпаведна, лік ейных узнагародаў пайшоў на трэці дзесятак.
Аліна Талай
Герасіменя не адзіная прыгажуня і спартоўка, якая абірае менавіта бел-чырвона-белы сьцяг — Аліна Талай чытае «Мову» Марціновіча, зьнялася ў кліпе белмоўнага гурта «Амарока», часам гаворыць на роднай мове і таксама нядаўна прынесла перамогі Беларусі на чэмпіянаце Эўропе па бегу. А вось тут пра «наш колер — бел-чырвона-белы».
Цмокі-Менск і Дынама-Менск
Цмокі. Такая назва ў менскага баскетбольнага клюбу з 201-га. Для ўсіх турніраў, у Эўропе, Расеі і дома. А таксама беларуская мова на эмблемах, аўдыёвізуальным суправаджэньні на хатніх матчах, сувэніры, друкаваная прадукцыя.
А вось да Дынама-Менск, пасьля скандалаў з «Пагоняй» і вершніцай, можа неўзабаве зьвярнуцца Павал Севярынец — палітыку прыпісваюць аўтарства маладафронтаўскага лёзунга «Верым! Можам! Пераможам!», які стаў афіцыйным для сталічных хакеістаў.
На матчах часта гучыць беларуская музыка, частка прадукцыі, банэраў робіцца на роднай мове, гімн для каманды напісаў «Палац».
Хацелі зрабіць і надпісы для КХЛ беларускай лацінкай, але там ініцыятыву каманды ў адміністрацыі Лігі не падтрымалі. А ў Адміністрацыі беларускага прэзідэнта, відаць, не падтрымалі ініцыятыву выступу «Brutto» на Менск-Арэне.
Сяргей Рутэнка
Сустветна вядомы гандбаліст таксама можа быць залічаны да тых, хто вызнае бел-чырвона-белы сьцяг правільным сымбалем краіны. Пра гэта ён сказаў у інтэрвію Прэсболу ў 2013.
Клюб «Ліцьвіны»
З ініцыятывы памерлага Ігара Жукоўскага ў Менску паўстаў клюб «Ліцьвіны», які грае ў амэрыканскі футбол. А турнір па гэтым відзе спорту названы ў гонар Вітаўта Вялікага.
Гульцы каманды, дарэчы, засьвяціліся ў новым кліпе «Brutto», на песню «Наша возьме».
Сяргей Пузанкевіч
Прэс-аташэ каманды «Тарпэда-БелАЗ», дыктар футбольнага стадыёну ў Жодзіне Сяргей Пузанкевіч — знакавая асоба ў нацыянальным футболе. Больш за два дзясяткі гадоў камэнтуе матчы сваёй каманды па-беларуску, а шматгадовы досьвед выкладаньня ў школе дазваляе істотна рассунуць спартовыя рамкі. Тут — ягонае нядаўняе інтэрвію для Свабоды.
Беларускія фанаты
Калі казаць пра беларускае ў спорце, было б няправільна не згадаць фанатаў. Прычым, не важна, у якім відзе спорту. Глядзіце самі.
Але, футбол тут, безумоўна, наперадзе.
Ініцыятыва па аднаўленьні «Тарпэда-Менск» фанатамі клюбу, беларускамоўныя крычалкі, банэры і стыкеры і беларуска-украінскую салідарнасьць на матчах зборных.
