Пісьменьнік Андрэй Федарэнка атрымаў прэмію «Гліняны Вялес» за кнігу «Ціша». Андрэй Федарэнка сказаў, што даведаўся пра гэта ад карэспандэнта Свабоды. Яго першая рэакцыя:
«Ну, мне бардзо міло».
Ён кажа, што гэта ня першая ў яго прэмія.
«У мяне былі прэміі імя Івана Мележа, яшчэ СССР-аўская за найлепшае апавяданьне сярод маладых пісьменьнікаў. Трэцяе месца на Гедройцю. Было некалькі драматургічных прэміяў. Але гэта было так даўно, што стала няпраўдай».
Карэспандэнт: «І вось вас знайшла прэмія „Гліняны Вялес“».
Федарэнка: «Мне прыемна, што на маё пакаленьне зьвяртаюць увагу. Я выдаў кнігу „Ціша“, не было ніводнай прэзэнтацыі. І я ніколі не прапаноўваю свае кнігі на прэміі. Але на прэміі я стараюся не зьвяртаць увагі. Вядома, ёсьць нейкі стымул для творчасьці. Але калі на гэта пачаць зьвяртаць увагу, гэтаму канца ня будзе. Мы бачым, што па прэміі Гедройця робіцца. А робіцца самапіяраньне, замест таго каб пісаць у цішы кабінэта, а ў каго няма, дык на кухні. Гэта проста марская вада, якой няможна будзе напіцца. Яно прыемна, і ня больш. А тады зноў — дастаў чарнавікі, адкрыў ноўтбук — і ўперад, як нічога і не было. Калі ў каго ёсьць што сказаць іншым. А калі няма, то трэба і памаўчаць».
У шорт-ліст «Глінянага Вялеса» ўвайшлі таксама кнігі Тацяны Барысік «Жанчына і леапард», Аляксандра І. Бацкеля «Маёнтак Рыбы», Віктара Марціновіча «Мова», Тацяны Нядбай «Сырэны сьпяваюць джаз», Аляксея Палачанскага «Цьвік», Сержука Сыса «Павук».
У ранейшыя гады «Глінянага Вялеса» атрымлівалі Эдуард Акулін, Сяргей Рублеўскі, Аляксандар Лукашук, Уладзімер Някляеў, Альгерд Бахарэвіч, Валянцін Акудовіч і іншыя.
Літаратурная прэмія «Гліняны Вялес» заснаваная Таварыствам вольных літаратараў у 1993 годзе. Уручаецца штогод, але стаць ляўрэатам можна толькі аднойчы.
