Уладзімер Ярмошын цяпер у камандзіроўцы ў Францыі. Пра тое, што ў сталічным гарвыканкаме зьявіўся новы кіраўнік, ён толькі што даведаўся.
Ярмошын: «Толькі што паведамілі».
Карэспандэнт: «І што вы можаце сказаць пра новага сталічнага гораданачальніка?»
Ярмошын: «Я паняцьця пра яго ня маю. І ня ведаю новага начальніка Менскага гарвыканкаму».
Карэспандэнт: «Ён каранямі зь віцебскага рэгіёну...»
Ярмошын: «Я зь ім не сустракаўся. Ніколі не размаўляў. Нават не перасякаўся дзесьці на хадзьбе».
Карэспандэнт: «Ладуцька ўсё ж быў зь Менску. Цяпер зноў новы кіраўнік сталіцы з рэгіёну».
Ярмошын: «Гэтага я камэнтаваць ня буду. Чаму так адбываецца, я гэтага ня ведаю».
Карэспандэнт: «Цяжкая гэтая праца — старшыня гарвыканкаму? Калі адкінуць канкрэтныя прозьвішчы, што цяжэй — кіраваць міністэрствам жыльлёва-камунальнай гаспадаркі ці сталіцай? Які воз цяжэйшы?»
Ярмошын (сьмяецца): «Я міністрам ЖКГ ніколі ня быў, увесь час працаваў у горадзе. Гэта — сур’ёзная праца. Вельмі сур’ёзная».
