Беларускія ўлады спадзяюцца, што ўкраінскі суд улічыць ня толькі праграмы Яўгена Новікава.
Украіна зьбіраецца забараніць трансьляцыю на сваёй тэрыторыі тэлевізійнага каналу «Беларусь 24». Нацыянальная Рада Ўкраіны па пытаньнях тэлебачаньня і радыёвяшчаньня прызнала тэлеканал «Беларусь 24» неадпаведным патрабаваньням Эўрапейскай канвэнцыі аб транспамежным тэлебачаньні, а таксама заканадаўству Ўкраіны, і зьвярнулася ў суд з пазовам аб забароне вяшчаньня на сваёй тэрыторыі.
Як рэагуе на гэтую сытуацыю Міністэрства замежных спраў Беларусі? Такое пытаньне задалі сёньня на брыфінгу ў МЗС прэсаваму сакратару зьнешнепалітычнага ведамства Беларусі Дзьмітрыю Мірончыку.
Мірончык адказаў:
«Мы самым уважлівым чынам адсочваем разьвіцьцё сытуацыі. Мы разьлічваем, што пры прыняцьці канчатковага рашэньня (а такое рашэньне, паводле ўкраінскіх законаў, прымаецца судом) будзе ўлічаны ўвесь комплекс праграмаў беларускага тэлеканалу, а ня толькі тэкст адной аўтарскай перадачы».
Падставаю для рашэньня Нацыянальнай Рады Ўкраіны па пытаньнях тэлебачаньня і радыёвяшчаньня сталіся скаргі тэлегледачоў, а таксама выбарковы маніторынг, які правялі ўкраінскія чыноўнікі, адказныя за мэдыйную палітыку.
Так, у праграме «Правы чалавека. Погляд у сьвет» на тэлеканале «Беларусь 24» гледачы выявілі антыўкраінскую прапаганду і скажэньне інфармацыі пра падзеі ва Ўкраіне.
Сярод іншых выказваньняў аўтара перадачы Яўгена Новікава прыводзяцца наступныя:
«Трэба прызнаць, што дапамога Данбасу з боку Расеі неацэнная, але і страты, нанесеныя Данбасу ўкраінскай арміяй, таксама ня маюць цаны і нават ня маюць назвы, бо якую ж назву можна даць дзеяньням Кіева, пасьля якіх ужо выяўленыя дзясяткі масавых пахаваньняў мірных грамадзян, пакараных Нацгвардыяй або „Правым сэктарам“, што адно і тое ж? І пакараных толькі за тое, што яны жадалі гаварыць на сваёй зямлі Данбаса, на Данбасе, на расейскай мове.
Не сумнявайцеся, вайна на Ўкраіне — гэта не на адзін год, і не на два, не на тры. Гэта на дзесяцігодзьдзі. Вайна на Ўкраіне пацягне за сабой новыя войны — і жывыя пазайздросьцяць мёртвым. Калі, вядома, Кіеў і яго заходнія куратары не адумаюцца, на што вельмі мала шанцаў».
