Украіна павінна абвесьціць ваеннае становішча і разарваць дыпляматычныя адносіны з Расейскай Фэдэрацыяй. Пра гэта ў Фэйсбуку напісаў дараднік міністра ўнутраных справаў Украіны Антон Герашчанка.
Трэба «ўвесьці дэ-факта ваеннае становішча без юрыдычных хітрыкаў і правесьці поўную мабілізацыю ўсіх наяўных ваенных, эканамічных і кадравых рэсурсаў для ажыцьцяўленьня дзеяньняў па выдварэньні войскаў Расеі з Украіны» — сьцьвярджае Герашчанка.
Ён таксама падкрэсьлівае, што Кіеву неабходна прасіць міжнароднай дапамогі.
Трэба «публічна зьвярнуцца да кожнай з краінаў, ад якіх мы хочам атрымаць дапамогу, з просьбай нам яе даць і такім чынам вызначыцца, з кім гэтая краіна — з Украінай, з агрэсарам, ці яе хата з краю?» — напісаў дараднік міністра ўнутраных справаў Украіны.
Паводле Герашчанкі, ваеннае становішча Вярхоўная Рада Ўкраіны павінна была ўвесьці яшчэ ў чэрвені або ліпені, таксама як і ратыфікаваць пагадненьне аб асацыяцыі з Эўразьвязам. Аднак, дадае ён, прыняць такія рашэньні ўкраінскі парлямэнт ня быў у змозе, бо там было «ўсяго толькі 160-180 патрыятычна і праўкраінску настроеных дэпутатаў». Да таго ж, лічыць Герашчанка, «Пуцін праз сваіх агентаў уплыву ў Вярхоўнай Радзе зрабіў бы ўсё, каб у галасаваньні за гэтыя два рашэньні не хапіла хаця б аднаго голасу».
27 жніўня Расея пачала поўнамаштабнае ўварваньне ва Ўкраіну. Пра гэта заявіў іншы дараднік міністра ўнутраных справаў Украіны — Зоран Шкірак. Наўпроставы ўдзел Расеі ў баявых дзеяньнях на ўсходзе Ўкраіны пацьвярджае таксама амбасадар ЗША ва Ўкраіне Джэфры Пает. Канцлер Нямеччыны Ангела Мэркель запатрабавала ад Расеі тлумачэньняў адносна прысутнасьці расейскіх войскаў на тэрыторыі Ўкраіны.
Яшчэ на гэтую тэму
Самае папулярнае
1