Нацыянальны экзіт-пол: Парашэнка перамагае ў першым туры (ЖЫВЫ БЛОГ)

У Данецкай вобласьці адкрыліся 308 выбарчых участкаў з 2430

Як паведамляе прэсавая служба Данецкай абласной адміністрацыі, «па стане на 8.45 галасаваньне пачалося на 308 участках з 2430. Аднак збор інфармацыі яшчэ працягваецца».

Яцанюк: «Першы візыт новага прэзыдэнта — у Брусэль»

Чарнігаў: голас кожнага — вырашальны

Пра ўпадабаньні ўкраінскіх выбарцаў рэпартаж з Чарнігава карэспандэнта Свабоды.

У Херсоне выбаркам закідалі «кактэйлямі Молатава»

Невядомыя 25 траўня каля 0:15 закідалі «кактэйлямі Молатава» выбарчы ўчастак у Херсоне, паведамляе Украінская праўда.

Міліцыя апэратыўна пагасіла пажар. З самай раніцы працаўнікі школы ліквідуюць наступствы. Зрабілі касмэтычны рамонт. Інцыдэнт не паўплывае на правядзеньне выбараў.

Затрыманых ва Ўкраіне расейскіх журналістаў Lifenews вызвалілі

Выбарчыя ўчасткі ў Данецку і Горлаўцы зачыненыя

Як паведамляе сайт Новости Донбасса, па стану на 8 гадзін выбарчыя ўчасткі ў Данецку і Горлаўцы не адчыніліся. Ці тычыцца гэта ўсіх участкаў — не паведамляецца.

Жыхары Крыма будуць галасаваць у Херсонскай і Мікалаеўскай абласьцях

Жыхары акупаванага Расеяй Крыма ня змогуць прагаласаваць на выбарах прэзыдэнта ў сябе дома.

Улады Украіны надалі ім магчымасьць прагаласаваць на бліжэйшых да іх участках у суседніх абласьцях — Херсонскай і Мікалаеўскай.

6 тысяч жыхароў Крыма дзеля гэтага ўжо зрабілі адпаведную рэгістрацыю.

У Марыюпалі 13 выбарчых участкаў не адкрыліся

У 8 гадзін не ўсе выбарчыя ўчасткі Марыюпаля адкрыліся. У 59 пакуль не пачалі працу 10 участковых камісій — ім проста ня выдалі бюлетэні.

У 58 выбарчай акрузе не працуюць 3 участковыя камісіі. Прычына — з-за недахопу людзей там камісіі не сфармаваныя, паведамляе мясцовы сайт.

Паведамленьні аб узломе сыстэмаў ЦВК Украіны — фальшыўка

Выбарчыя ўчасткі адчыніліся

Выбарчыя ўчасткі будуць працаваць з 8.00 да 20.00.

Амаль 80 % выбаршчыкаў гатовыя прыняць удзел у галасаваньні 25 траўня. Такія вынікі агульнанацыянальнага апытаньня, праведзенага фондам «Дэмакратычныя ініцыятывы імя Ілька Кучарыва» сумесна з цэнтрам імя Разумкова з 14 па 18 траўня.

За мяжой на выбарах прэзыдэнта Ўкраіны будуць галасаваць 400 тысяч украінцаў.

Вайскоўцы ўзброеных сіл Украіны прагаласуюць на звычайных участках, а для міратворцаў створаны дадатковыя замежныя ўчасткі для галасаваньня.

У Камітэце выбаршчыкаў Украіны прагназуюць, што ў дзень галасаваньня могуць не адкрыцца каля 5% выбарчых участкаў, калі сытуацыя на ўсходзе Ўкраіны ня зьменіцца.

АБСЭ ня будзе назіраць у Данбасе

АБСЭ па ўсёй верагоднасьці не накіруе ў дзень выбараў ва Ўкраіне сваіх назіральнікаў ва ўсходнія рэгіёны краіны ў сувязі з небясьпечнай абстаноўкай у Данецкай і Луганскай абласьцях, паведамляе Reuters.

Маніторынгавая місія АБСЭ на выбарах ва Ўкраіне налічвае каля тысячы чалавек. Вынікі яе назіраньня будуць агучаныя ў панядзелак па абедзе.

Захопленага кіраўніка выбарчай камісіі баевікі «ДНР» адпусьцілі

Чатыры гадзіны ў Мар’інцы на Данеччыне тэрарысты ўтрымлівалі ў закладніках кіраўніка акруговай выбарчай камісіі № 60 Уладзімера Палякова.

Пра гэта паведамляе 5 канал са спасылкай на Камітэт выбаршчыкаў Украіны.

Палякова запалохвалі і пагражалі яму, намагаючыся сарваць працу выбарчай камісіі.

Сэпаратысты ўзялі ўсю дакумэнтацыю, вынесьлі на вуліцу і спалілі. А Палякова ўзялі ў закладнікі і зьехалі ў невядомым кірунку. Яго месцазнаходжаньне было невядома, але пасьля тэрарысты яго адпусьцілі.

Палякову пагражалі, казалі, што выбары на тэрыторыі Данецкай народнай рэспублікі незаконныя і камісія займаецца злачыннай дзейнасьцю. Захопнікі пагражалі яму таксама фізычным зьнішчэньнем.

Выбары ў Данбасе нажыва

25 траўня ва Ўкраіне адбываюцца пазачарговыя выбары прэзыдэнта, якія праходзяць пад ціскам дывэрсантаў з Расеі і ўзброеных сэпаратыстаў у Данецкай і Луганскай абласьцях.
Галасаваньне адбываецца з 8 раніцы да 8 вечара. У бюлетэні для галасаваньня ўнесеныя прозьвішчы 21 кандыдата. 6 зь іх заявілі, што здымаюцца з выбарчай гонкі, але зрабілі гэта ўжо пасьля вызначанага законам тэрміну адмовы ад удзелу ў выбарах.

Выбары прызначаныя ў сувязі з адхіленьнем ад пасады былога прэзыдэнта Віктара Януковіча, які 21 лютага ўцёк з Украіны ў Расею на хвалі масавых пратэстаў супраць адмовы ад эўрапейскай інтэграцыі і масавых ахвяр у Кіеве.

Расея не прызнала адхіленьне Януковіча ад улады, анэксавала Аўтаномную Рэспубліку Крым.

З Расеі ва Ўкраіну прыбылі ўзброеныя дывэрсанты, якім удалося распаліць сэпаратысцкі рух у Данецкай і Луганскай абласьцях. У гэтым рэгіёне ўлада абвясьціла Антытэрарыстычную апэрацыю, у супрацьстаяньні ўжо шмат ахвяр з абодвух бакоў.

Выбары ў большасьці акруг Луганскай і Данецкай абласьцях пад пагрозай зрыву.

Лідэрамі прэзыдэнцкай гонкі сацыёлягі лічаць бізнэсоўца Пятра Парашэнку і экс-прэм’ера Юлію Цімашэнку.

Адначасова ў Кіеве, Адэсе і некаторых іншых гарадах праводзяць выбары мэраў.

Жывы блог: Украіна перад выбарамі. Дзень цішыні