9 траўня ў Менску пачаўся чэмпіянат сьвету па хакеі. Беларусь упершыню ў сваёй незалежнай гісторыі прымае ў сябе спартовы турнір такога ўзроўню і маштабу.
Кангрэс Міжнароднай Фэдэрацыі хакею (IIHF) зацьвердзіў Менск як месца правядзеньня чэмпіянату пяць гадоў таму, у 2009-м. Пасьля зьяўленьня ў Беларусі дзясяткаў палітвязьняў у выніку прэзыдэнцкіх выбараў 19 сьнежня 2010 году беларускія і міжнародныя праваабаронцы заклікалі перанесьці чэмпіянат зь Менску ці байкатаваць яго. Аднак гэтыя заклікі не прывялі да нейкіх канкрэтных рашэньняў. Міжнародная хакейная фэдэрацыя заяўляла, што спорт стаіць па-за палітыкай.
Можна, аднак, заўважыць, што большасьць хакейных грандаў даслалі на чэмпіянат у Менск далёка ня самыя моцныя каманды. Напрыклад, у зборнай Канады, якая перамагла сёлета на апошняй Алімпіядзе ў Сочы, няма ніводнага алімпійскага чэмпіёна. Адсутнічаюць самыя яркія хакейныя зоркі і ў камандах ЗША, Фінляндыі, Швэцыі.
Зборная Беларусі на апошніх чэмпіянатах сьвету выступае стабільна кепска, займаючы 14-е месца тры гады запар. Найлепшы вынік на чэмпіянатах сьвету — 6 месца ў 2006 годзе, на Алімпіядах — 4 месца ў 2002 годзе (славутая перамога над швэдамі). На 9 траўня Беларусь займае ў рэйтынгу Міжнароднай фэдэрацыі хакею 15 месца.
Разам з тым на цяперашні чэмпіянат сьвету ў Менску беларусам удалося сабраць фактычна ўсіх найлепшых гульцоў, і гэта дае заўзятарам спадзяваньні на аптымістычны вынік — асабліва на фоне ня самых моцных складаў іншых камандаў. Перад камандай і яе трэнэрам, канадцам Гленам Хэнланам, пастаўленая задача-мінімум — выйсьці ў васьмёрку мацнейшых. Букмэкеры, аднак, ацэньваюць шанцы беларускай зборнай вельмі невысока — за перамогу Беларусі на чэмпіянаце сьвету можна атрымаць 200 да аднаго. Фаварытамі лічацца расейцы, канадцы і швэды — за іх даюць каля 4 да аднаго.
Напярэдадні чэмпіянату сьвету беларускія ўлады правялі «палітычную зачыстку», арыштоўваючы апазыцыйных актывістаў. Сцэнар быў аднолькавы: актывіста хапалі звычайна каля дому, прывозілі ў суд, дзе гучала стандартнае абвінавачаньне — дробнае хуліганства і непадпарадкаваньне супрацоўнікам міліцыі. Суд даваў адміністратыўны арышт на 10–25 сутак. Такім чынам за апошнія тыдні па ўсёй Беларусі былі арыштаваныя каля 30 чалавек.
Кангрэс Міжнароднай Фэдэрацыі хакею (IIHF) зацьвердзіў Менск як месца правядзеньня чэмпіянату пяць гадоў таму, у 2009-м. Пасьля зьяўленьня ў Беларусі дзясяткаў палітвязьняў у выніку прэзыдэнцкіх выбараў 19 сьнежня 2010 году беларускія і міжнародныя праваабаронцы заклікалі перанесьці чэмпіянат зь Менску ці байкатаваць яго. Аднак гэтыя заклікі не прывялі да нейкіх канкрэтных рашэньняў. Міжнародная хакейная фэдэрацыя заяўляла, што спорт стаіць па-за палітыкай.
Можна, аднак, заўважыць, што большасьць хакейных грандаў даслалі на чэмпіянат у Менск далёка ня самыя моцныя каманды. Напрыклад, у зборнай Канады, якая перамагла сёлета на апошняй Алімпіядзе ў Сочы, няма ніводнага алімпійскага чэмпіёна. Адсутнічаюць самыя яркія хакейныя зоркі і ў камандах ЗША, Фінляндыі, Швэцыі.
Зборная Беларусі на апошніх чэмпіянатах сьвету выступае стабільна кепска, займаючы 14-е месца тры гады запар. Найлепшы вынік на чэмпіянатах сьвету — 6 месца ў 2006 годзе, на Алімпіядах — 4 месца ў 2002 годзе (славутая перамога над швэдамі). На 9 траўня Беларусь займае ў рэйтынгу Міжнароднай фэдэрацыі хакею 15 месца.
Разам з тым на цяперашні чэмпіянат сьвету ў Менску беларусам удалося сабраць фактычна ўсіх найлепшых гульцоў, і гэта дае заўзятарам спадзяваньні на аптымістычны вынік — асабліва на фоне ня самых моцных складаў іншых камандаў. Перад камандай і яе трэнэрам, канадцам Гленам Хэнланам, пастаўленая задача-мінімум — выйсьці ў васьмёрку мацнейшых. Букмэкеры, аднак, ацэньваюць шанцы беларускай зборнай вельмі невысока — за перамогу Беларусі на чэмпіянаце сьвету можна атрымаць 200 да аднаго. Фаварытамі лічацца расейцы, канадцы і швэды — за іх даюць каля 4 да аднаго.
Напярэдадні чэмпіянату сьвету беларускія ўлады правялі «палітычную зачыстку», арыштоўваючы апазыцыйных актывістаў. Сцэнар быў аднолькавы: актывіста хапалі звычайна каля дому, прывозілі ў суд, дзе гучала стандартнае абвінавачаньне — дробнае хуліганства і непадпарадкаваньне супрацоўнікам міліцыі. Суд даваў адміністратыўны арышт на 10–25 сутак. Такім чынам за апошнія тыдні па ўсёй Беларусі былі арыштаваныя каля 30 чалавек.