Жалобны маратон пачаўся з затрыманьняў

З пастарунку пачалі выпускаць удзельнікаў акцыі. Першымі выйшлі прадпрымальнік Алесь Макаеў і актывіст БХД Аляксей Шэін.

Фотагалерэя: Шанаваньне памяці ахвяраў таталітарных рэпрэсіяў на Кальварыйскіх могілках

Міліцыянты адпусьцілі Ганну Шапуцьку і Ільлю Дабратвора з сынам.

Удзельнікі акцыі кажуць, што будуць вымушаныя скараціць праграму жалобнага маратона. Але Курапаты яны абавязкова наведаюць. Канчатковае рашэньне, што рабіць далей, будзе ўхваленае, калі выпусьцяць усіх актывістаў.

Вызвалілі ўсіх удзельнікаў акцыі.



Апошняй з кійком выйшла Галіна Сіўчык. Міліцыянты хацелі забраць бел-чырвона-белы шалік, але яна не аддала.

Удзельнікі маратону накіраваліся да пахаваньняў ахвяр сталінізму ў Лошыцы.

А 17-й гадзіне зьбіраюцца прыехаць у Курапаты.

Удзельнікі маратону наведалі месца масавых расстрэлаў у Лошыцы. Ускладаньне кветак прайшло без затрыманьняў.

Да памятнага знаку рэпрэсаваным у парку Чалюскінцаў усклалі кветкі, запалілі каплічкі. Адсюль удзельнікі акцыі накіроўваюцца ў Курапацкі лес. Выступіў Вацлаў Нямковіч старшыня хрысьціянскай злучнасьці «Курапаты».

У Курапацкім лесе ўсталявалі новы крыж — прадстаўнікам інтэлігенцыі, якія загінулі ў ноч з 29 на 30 кастрычніка. Прысутнічала каля трыццаці чалавек, сярод іх маці палітвязьняў Мікалая Аўтуховіча і Алякандра Францкевіча, былыя палітвязьні. Прысутныя трымаюць бел-чырвона-белыя сьцягі. Да крыжа ўсклалі кветкі.

Каля крыжа «Пакутнікам Беларусі» адбылася агульная малітва. Потым удзельнікі адзначэньня пройдуць крыжовым шляхам па Курапацкім лесе з запаленымі зьнічамі.

На крыжах уздоўж дарогі ў Курапацкім лесе ўдзельнікі акцыі паставілі запаленыя зьнічкі. На гэтым акцыя скончылася.