Зьміцер Іваноўскі знаходзіцца ў спэцпрыёмніку Кастрычніцкага райаддзелу міліцыі. Дзяжурны па спэцпрыёмніку мне сёньня паведаміў, што скаргаў на здароўе ў арыштаванага нібыта няма, і галадоўка працягваецца. Некалькі разоў за кратамі галадаў таксама Валеры Леванеўскі — кіраўнік незарэгістраванага страйкаму прадпрымальнікаў.
(Леванеўскі: ) “Галадаць там вельмі лёгка. Чаму? — бо есьці там нармальнаму чалавеку немагчыма”.
Валеры Леванеўскі доўга змагаўся, каб палепшыць умовы утрыманьня ў спэцпрыёмніку. Ён гаворыць, што сёе-тое ўдалося зьмяніць. Напрыклад, можна цяпер атрымліваць амаль любыя перадачы, неабмежаваную колькасьць цыгарэтаў.
(Леванеўскі: ) “І расклад зьмяніўся: цяпер там усіх выводзяць у прыбіральню — калі захочуць, а раней выводзілі толькі а шостай раніцы”.
Праўда, Валеры Леванеўскі зазначае, што арыштаваныя па-ранейшаму ляжаць не на ложках, а папросту на драўлянай падлозе, і камэры часьцяком перапоўненыя.
