25 сакавіка – найважнейшая дата ў гісторыі незалежнай Беларусі. Менавіта ў гэты дзень у 1918 годзе ў Менску была абвешчаная Беларуская Народная Рэспубліка. Цяпер Беларусь мусіла сама стварыць свае органы ўлады і ўсталяваць міжнародныя дачыненьні зь іншымі краінамі. У Трэцяй Устаўной Грамаце названыя канкрэтныя тэрыторыі, якія павінны ўвайсьці ў склад БНР: Магілёўшчына, Меншчына, Гарадзеншчына (з Горадняй і Беластокам), Віленшчына, Віцебшчына, Смаленшчына, Чарнігаўшчына і сумежныя часткі суседніх губэрняў, заселеныя беларусамі (меліся на ўвазе часткі Сувалкаўскай і Ковенскай губэрняў). З тых часоў і да сёньня 25 сакавіка – найважнейшае нацыянальнае сьвята сьведамых беларусаў ва ўсім сьвеце. У гэты дзень праводзяцца ўрачыстыя набажэнствы і акадэміі, а ў Менску ды іншых гарадах Беларусі апошнія 10 гадоў людзі выходзяць на сьвяточныя дэманстрацыі і мітынгі.
Цікава, што таксама 25 сакавіка адзначаюць свой Дзень незалежнасьці Грэцыя і Кіпр. Ва Ўкраіне сёньня Дзень службы бясьпекі, а ў Латвіі – Дзень памяці ахвяраў камуністычнага тэрору.
У каталіцкім календары сёньня – Дабравесьце, а ў праваслаўным – Рыгор. “На Рыгора ідзе зіма ў мора”, – казалі людзі, маючы на ўвазе крыгаход на рэках.
25 сакавіка 1905 году на Случчыне нарадзіўся незвычайны чалавек – Аляксандар Вечар. З аднаго боку – біяхімік, акадэмік, дасьледнік плястыдаў і стваральнік новых тэхналёгіяў атрыманьня каратыну з морквы і вырабу вітаміну В2 на падставе мікрабіялягічнага сынтэзу, а зь іншага боку – беларускі паэт, аўтар зборнікаў вершаў “Кола дзён“ і “Зварот да слова“.
Сёньня адзначае свае 50-я ўгодкі кампазытар Уладзімер Кур'ян. Родам ён зь Менску, скончыў Беларускую дзяржаўную кансэрваторыю і ўжо 20 гадоў працуе загадчыкам музычнае часткі Купалаўскага тэатру. Уладзімер Кур'ян – аўтар музыкі да найбольш пасьпяховых спэктакляў тэатру апошніх дзесяцігодзьдзяў – «Тутэйшых» паводле п'есы Янкі Купалы і «Ідыліі» паводле Дуніна-Марцінкевіча.
Наогул сярод знакамітых людзей сьвету 25 сакавіка нараджаліся пераважна кампазытары і музыкі. Варта згадаць італьянскага дырыжора і кіраўніка тэатру «Ля-Скала» Артура Тасканіні, або вугорскага кампазытара Бэлу Бартака, або ангельскага музыку Элтана Джона, якому сёньня спаўняецца 57 гадоў.
