10 ліпеня Менскі гарадзкі гаспадарчы суд разглядаў пазоў установы па абароне правоў вязьняў «Плятформа» да Белтэлерадыёкампаніі і пакінуў яго без задавальненьня. «Плятформа» дамагалася абвяржэньня зьвестак у праграме «Ў цэнтры ўвагі», якую вядзе Юры Пракопаў, дзе арганізацыю назвалі «каляправаабарончай».
У чэрвені кіраўнік «Плятформы» былы палітвязень Андрэй Бандарэнка дамагаўся ў Першамайскім судзе грашовай кампэнсацыі ад БТ і Юрыя Пракопава за зьвесткі, якія ён палічыў зьнявагай, але — таксама марна.
Сёньняшняе рашэньне судзьдзі Васіля Данілюка пракамэнтаваў «Свабодзе» Андрэй Бандарэнка:
Андрэй Бандарэнка
«Для нас з большага нічога дзіўнага. Затое мы стварылі некалькі прэцэдэнтаў. Раней — гэта тое, што мы, аказваецца, можам беспакарана называць адзін аднаго мянушкамі. Другі — вось зараз мы можам, прыкладам, называць супрацоўнікаў Белтэлекампаніі „каляжурналістамі“. Адносна дзяржаўных органаў гэтаксама: супрацоўнікі калядзяржаўных органаў. І гэтак далей. У выніку мы праінфармуем нашых партнэраў за мяжой, зь якімі мы супрацоўнічаем, што беларускія суды вось гэтакія прымаюць рашэньні».
Андрэй Бандарэнка мяркуе, што рашэньне Менскага гаспадарчага суду будзе абскарджанае.
