У Варшаве завяршыўся саміт "Усходняга партнэрства", які праходзіў без удзелу прадстаўнікоў афіцыйнага Менску. Інфармацыя пра адсутнасьць беларускай дэлегацыі сталася практычна дамінантнай цягам другога і апошняга дня саміту.
Прэм'ер-міністар Польшчы Дональд Туск і старшыня Эўрапейскай рады Гэрман ван Ромпэй вітаюць удзельнікаў саміту "Ўсходняга партнэрства" ў Варшаве. Сотні рэпартэраў, камэры, здымкі – трансьляцыя амаль ува ўсёй Эўропе. Гэтак пачаўся саміт "Усходняга партнэрства". Безь беларускай дэлегацыі.
Прэм'ер-міністар Польшчы Дональд Туск і старшыня Эўрапейскай рады Гэрман ван Ромпэй
"Раніцай мы атрымалі ад беларускага боку інфармацыю, што беларускай дэлегацыі ня будзе. Шкада, што беларускі рэжым ізалюе 10-мільённы эўрапейскі народ ад карыснага супрацоўніцтва ў межах "Усходняга партнэрства", – заявіў прэсавы сакратар польскага прэзыдэнцтва ў ЭЗ Конрад Ніклевіч.
МЗС Польшчы запрасіў на саміт міністра замежных справаў Беларусі Сяргея Мартынава, але той адмовіўся, панізіўшы ранг дэлегацыі да беларускага амбасадара ў Польшчы Віктара Гайсёнка.
"У пятніцу беларускі амбасадар зможа ўзяць удзел ува ўсіх мерапрыемствах, пленарных паседжаньнях саміту, калі, натуральна, захоча", – казаў у чацьвер міністар замежных справаў Польшчы Радаслаў Сікорскі.
У пятніцу, а не ў чацьвер – бо ранг беларускай дэлегацыі занадта нізкі, каб узяць удзел ва ўрачыстай вячэры зь лідэрамі 32 эўрапейскіх краінаў. Магчыма, менавіта на гэта і пакрыўдаваў беларускі бок, адмаўляючыся ад удзелу ў форуме з прычыны "дыскрымінацыі беларускай дэлегацыі".
"Мы сёньня ня ў поўным складзе, бо, нягледзячы на запрашэньне, у сёньняшніх нарадах не бярэ ўдзелу Беларусь – адна з краінаў "Усходняга партнэрства". Гэта яшчэ адзін моцны сыгнал аб тым, наколькі важныя для Эўропы і Беларусі перамены, якіх мы ўсе чакаем», – заявіў на пачатку другога дня саміту прэм'ер-міністар Польшчы Дональд Туск.
У саміце ў Варшаве ўзялі ўдзел прадстаўнікі беларускіх дэмакратычных сілаў
Дэмарш беларускай дэлегацыі стаўся адной з галоўных падзеяў форуму, адставіўшы на другі плян шэраг іншых пытаньняў, якія маюць ключавое значэньне для рэшты краінаў, што ўваходзяць у праграму.
На выніковай прэсавай канфэрэнцыі Дональд Туск заявіў, што да канца бягучага году будзе падпісанае пагадненьне паміж Украінай і Эўразьвязам аб партнэрстве, пачнуцца перамовы з Малдовай і Грузіяй аб паглыбленьні эканамічнага супрацоўніцтва.
Міхаіл Саакашвілі, Ільхам Аліеў і Віктар Януковіч падчас саміту ў Варшаве
Гаворачы пра Беларусь, Туск пацьвердзіў неафіцыйную інфармацыю аб тым, што Эўразьвяз выказаў намер падрыхтаваць адмысловы пакет дапамогі для Беларусі, вартасьць якога складае 9 мільярдаў даляраў. Гаворка ідзе пра гранты і крэдыты у тым ліку ад МВФ і Эўрапейскага інвэстыцыйнага банку, інвэстыцыі, а акрамя эканамічных пытаньняў у пакеце – зьмякчэньне візавага рэжыму.
"Мы вельмі выразна падкрэсьлівалі гэта ў часе спатканьняў зь беларускай апазыцыяй і перакажам гэты адназначны сыгнал беларускім уладам, што ўмовай пачатку працы над гэтым пакетам ёсьць вызваленьне і рэабілітацыя ўсіх палітвязьняў, пачатак размоваў паміж уладамі і апазыцыяй і, па-трэцяе, правядзеньне выбараў у адпаведнасьці са стандартамі АБСЭ", – заявіў Дональд Туск.
Дональд Туск вітае Ўладзімера Някляева
Між тым, як неафіцыйна паведамлялася раней, на саміце плянавалася ўхваліць адмысловую дэклярацыю, у якой краіны-падпісанты асудзілі б парушэньні правоў чалавека ў Беларусі.
“Аднак гэтага дакумэнту не падпісалі дзяржавы-ўдзельніцы праграмы "Ўсходняга партнэрства", і ён ня быў у выніку прыняты”, – заявіў старшыня Эўпрапарлямэнту Ежы Бузэк.
Удзельнікі саміту "Ўсходняга партнэрства" Эўразьвязу прынялі палітычную дэклярацыю сустрэчы, у якой асуджэньне Беларусі за палітычных вязьняў ды рэпрэсіі супраць грамадзянскай супольнасьці і СМІ было выключанае з асноўнага тэксту і далучанае да яе як дадатак.
Дадатак суправаджаецца заўвагай, што ён быў зацьверджаны толькі прадстаўнікамі краінаў-сяброў Эўразьвязу, а ня ўсімі ўдзельнікамі саміту, то бок не зацьверджаны краінамі-ўдзельнікамі "Ўсходняга партнэрства".
Тэкст дадатку да дэклярацыі адносна Беларусі гучыць так:
«Кіраўнікі дзяржаваў і ўрадаў і прадстаўнікі ЭЗ і яго дзяржавы-сябры выказваюць сваю глыбокую заклапочанасьць пагаршэньнем сытуацыі з правамі чалавека, дэмакратыяй і вяршэнствам закону ў Беларусі, асуджаюць няспыннае пагаршэньне стану свабоды прэсы ў Беларусі і патрабуюць неадкладна вызваліць і рэабілітаваць усіх палітычных зьняволеных, спыніць рэпрэсіі грамадзянскай супольнасьці і сродкаў масавай інфармацыі ды пачаць палітычны дыялёг з апазыцыяй.
ЭЗ таксама глыбока занепакоены паведамленьнямі аб тым, што зьняволеныя ня маюць кантакту зь сем'ямі і адвакатамі і доступу да мэдычнай дапамогі ды знаходзяцца пад псыхалягічным і фізычным ціскам. ЭЗ неаднаразова прапаноўваў паглыбіць свае адносіны зь Беларусьсю; пацьвярджаючы цяпер сваю палітыку ўзаемадзеяньня, ЭЗ зноў заяўляе, што такое паглыбленьне залежыць ад таго, ці беларускія улады пакажуць прагрэс у пашане дэмакратыі, вяршэнства закону і правоў чалавека».
Прэм'ер-міністар Польшчы Дональд Туск і старшыня Эўрапейскай рады Гэрман ван Ромпэй вітаюць удзельнікаў саміту "Ўсходняга партнэрства" ў Варшаве. Сотні рэпартэраў, камэры, здымкі – трансьляцыя амаль ува ўсёй Эўропе. Гэтак пачаўся саміт "Усходняга партнэрства". Безь беларускай дэлегацыі.
"Раніцай мы атрымалі ад беларускага боку інфармацыю, што беларускай дэлегацыі ня будзе. Шкада, што беларускі рэжым ізалюе 10-мільённы эўрапейскі народ ад карыснага супрацоўніцтва ў межах "Усходняга партнэрства", – заявіў прэсавы сакратар польскага прэзыдэнцтва ў ЭЗ Конрад Ніклевіч.
МЗС Польшчы запрасіў на саміт міністра замежных справаў Беларусі Сяргея Мартынава, але той адмовіўся, панізіўшы ранг дэлегацыі да беларускага амбасадара ў Польшчы Віктара Гайсёнка.
"У пятніцу беларускі амбасадар зможа ўзяць удзел ува ўсіх мерапрыемствах, пленарных паседжаньнях саміту, калі, натуральна, захоча", – казаў у чацьвер міністар замежных справаў Польшчы Радаслаў Сікорскі.
У пятніцу, а не ў чацьвер – бо ранг беларускай дэлегацыі занадта нізкі, каб узяць удзел ва ўрачыстай вячэры зь лідэрамі 32 эўрапейскіх краінаў. Магчыма, менавіта на гэта і пакрыўдаваў беларускі бок, адмаўляючыся ад удзелу ў форуме з прычыны "дыскрымінацыі беларускай дэлегацыі".
"Мы сёньня ня ў поўным складзе, бо, нягледзячы на запрашэньне, у сёньняшніх нарадах не бярэ ўдзелу Беларусь – адна з краінаў "Усходняга партнэрства". Гэта яшчэ адзін моцны сыгнал аб тым, наколькі важныя для Эўропы і Беларусі перамены, якіх мы ўсе чакаем», – заявіў на пачатку другога дня саміту прэм'ер-міністар Польшчы Дональд Туск.
Дэмарш беларускай дэлегацыі стаўся адной з галоўных падзеяў форуму, адставіўшы на другі плян шэраг іншых пытаньняў, якія маюць ключавое значэньне для рэшты краінаў, што ўваходзяць у праграму.
На выніковай прэсавай канфэрэнцыі Дональд Туск заявіў, што да канца бягучага году будзе падпісанае пагадненьне паміж Украінай і Эўразьвязам аб партнэрстве, пачнуцца перамовы з Малдовай і Грузіяй аб паглыбленьні эканамічнага супрацоўніцтва.
Гаворачы пра Беларусь, Туск пацьвердзіў неафіцыйную інфармацыю аб тым, што Эўразьвяз выказаў намер падрыхтаваць адмысловы пакет дапамогі для Беларусі, вартасьць якога складае 9 мільярдаў даляраў. Гаворка ідзе пра гранты і крэдыты у тым ліку ад МВФ і Эўрапейскага інвэстыцыйнага банку, інвэстыцыі, а акрамя эканамічных пытаньняў у пакеце – зьмякчэньне візавага рэжыму.
"Мы вельмі выразна падкрэсьлівалі гэта ў часе спатканьняў зь беларускай апазыцыяй і перакажам гэты адназначны сыгнал беларускім уладам, што ўмовай пачатку працы над гэтым пакетам ёсьць вызваленьне і рэабілітацыя ўсіх палітвязьняў, пачатак размоваў паміж уладамі і апазыцыяй і, па-трэцяе, правядзеньне выбараў у адпаведнасьці са стандартамі АБСЭ", – заявіў Дональд Туск.
Між тым, як неафіцыйна паведамлялася раней, на саміце плянавалася ўхваліць адмысловую дэклярацыю, у якой краіны-падпісанты асудзілі б парушэньні правоў чалавека ў Беларусі.
“Аднак гэтага дакумэнту не падпісалі дзяржавы-ўдзельніцы праграмы "Ўсходняга партнэрства", і ён ня быў у выніку прыняты”, – заявіў старшыня Эўпрапарлямэнту Ежы Бузэк.
Беларусь асудзілі толькі ў дадатку. І ня ўсе
Удзельнікі саміту "Ўсходняга партнэрства" Эўразьвязу прынялі палітычную дэклярацыю сустрэчы, у якой асуджэньне Беларусі за палітычных вязьняў ды рэпрэсіі супраць грамадзянскай супольнасьці і СМІ было выключанае з асноўнага тэксту і далучанае да яе як дадатак.
Дадатак суправаджаецца заўвагай, што ён быў зацьверджаны толькі прадстаўнікамі краінаў-сяброў Эўразьвязу, а ня ўсімі ўдзельнікамі саміту, то бок не зацьверджаны краінамі-ўдзельнікамі "Ўсходняга партнэрства".
Тэкст дадатку да дэклярацыі адносна Беларусі гучыць так:
«Кіраўнікі дзяржаваў і ўрадаў і прадстаўнікі ЭЗ і яго дзяржавы-сябры выказваюць сваю глыбокую заклапочанасьць пагаршэньнем сытуацыі з правамі чалавека, дэмакратыяй і вяршэнствам закону ў Беларусі, асуджаюць няспыннае пагаршэньне стану свабоды прэсы ў Беларусі і патрабуюць неадкладна вызваліць і рэабілітаваць усіх палітычных зьняволеных, спыніць рэпрэсіі грамадзянскай супольнасьці і сродкаў масавай інфармацыі ды пачаць палітычны дыялёг з апазыцыяй.
ЭЗ таксама глыбока занепакоены паведамленьнямі аб тым, што зьняволеныя ня маюць кантакту зь сем'ямі і адвакатамі і доступу да мэдычнай дапамогі ды знаходзяцца пад псыхалягічным і фізычным ціскам. ЭЗ неаднаразова прапаноўваў паглыбіць свае адносіны зь Беларусьсю; пацьвярджаючы цяпер сваю палітыку ўзаемадзеяньня, ЭЗ зноў заяўляе, што такое паглыбленьне залежыць ад таго, ці беларускія улады пакажуць прагрэс у пашане дэмакратыі, вяршэнства закону і правоў чалавека».
