Лазавік: у ПАРЭ накіравалі "паклёп і дыскрэдытацыю"

18 лістапада ў Парыжы на паседжаньні Палітычнага камітэту Парлямэнцкай асамблеі Рады Эўропы (ПАРЭ) будзе абмяркоўвацца сытуацыя ў Беларусі. У пасяджэньні возьмуць удзел прадстаўнікі беларускіх уладаў і апазыцыі.

На пасяджэньні выступіць дакладчык ПАРЭ па Беларусі Сініка Хурскайнэн, якая ў жніўні наведвала Беларусь з азнаямленчым візытам. Затым чакаецца дыскусія з удзелам старшыні камісіі па заканадаўстве і дзяржаўным будаўніцтве Савету Рэспублікі Беларусі Яўгена Сьмірнова, карэспандэнта дзяржаўнай "Народнай газэты" Андрэя Бабка, кандыдата ў прэзыдэнты, сустаршыні Беларускай хрысьціянскай дэмакратыі Віталя Рымашэўскага і намесьніка старшыні Беларускай асацыяцыі журналістаў Андрэя Аляксандрава.

Сакратар Цэнтравыбаркаму Мікалай Лазавік выказаў абурэньне на адрас праваабаронцаў, якія "перадалі ў ПАРЭ інфармацыю, якая не адпавядае рэчаіснасьці і патрабаваньням заканадаўства".

"Гэта інфармацыя, якая стала ўжо прадметам абмеркаваньня ў ПАРЭ, і якая па сутнасьці дыскрэдытуе нашу выбарчую сыстэму, яна ня толькі ня мае юрыдычнай падставы, а зьяўляецца сапраўдным паклёпам на нашу выбарчую сыстэму".

Мікалай Лазавік прывёў прыклад. Паводле праваабаронцаў, назіральнікі не дапускаліся да праверкі подпісаў за вылучэньне кандыдатаў у прэзыдэнты і гэтым самым іх правы абмяжоўваліся. Мікалай Лазавік заяўляе, што назіральнікі ў раённыя камісіі накіроўваюцца на пасяджэньні, а назіраньне за падрыхтоўкай матэрыялаў для пасяджэньняў ня ўключана ў пералік дзеяньняў назіральнікаў. Камэнтуючы гэта, праваабаронца Валянцін Стэфановіч адзначыў:

"Мы лічым, што ўключана, што артыкул 13-ы, які ўтрымлівае пералік правоў назіральнікаў, не зьяўляецца вычарпальным. Бо вычарпальным зьяўляецца тое, што назіральнік ня можа рабіць. Таму калі працэдура праверкі подпісаў прапісана ў выбарчым кодэксе, то мы мусім за ёй назіраць. Інакш мы ня можам пацьвердзіць, што гэтыя 10 кандыдатаў сабралі подпісы, і што некаторыя подпісы былі прызнаныя несапраўднымі па нейкіх прычынах. Мы вымушаны давяраць толькі таму, што кажуць камісіі, якія сфармаваныя вядома якім чынам. Мы паспрабавалі накіраваць назіральнікаў, іх не дапусьцілі, вось і ўсё. Якія праблемы?"

Спадар Стэфановіч адзначыў, што праваабаронцы ў сваіх справаздачах пісалі, што працэдура праверкі подпісаў "была цалкам закрытай і непразрыстай".

Нягледзячы на тое, што 18 лістапада ў Менску пройдзе рэгістрацыя, кандыдат у прэзыдэнты Віталь Рымашэўскі вырашыў узяць удзел у пасяджэньні Паліткамітэту ПАРЭ ў Парыжы. Падчас дэбатаў ён выкажацца адносна сытуацыі ў Беларусі.

"Свабодных выбараў ужо ў Беларусі няма. Ужо сёньня ў камісіі ня ўключаны прадстаўнікі дэмакратычных колаў у сваёй большасьці, няма доступу да СМІ. Дзяржаўныя СМІ — манапалісты, і нават імёны кандыдатаў згадваюцца мімаходзь, магчыма, раз на тыдзень, і тое ня ўсіх. Зь іншага боку, я зьяўляюся прыхільнікам адкрытасьці Эўразьвязу да Беларусі. Я не прымаю канцэпцыю, што расейскія штыкі могуць прынесьці сюды дэмакратыю. Пазыцыя БХД тут найбольш узважаная, канструктыўная, не марыянэткавая".