Падчас тэлемосту зь Бялградам, зладжанага Першым нацыянальным тэлеканалам, сьпявак заявіў, што яму было ня сорамна за ўласны выступ.
Напярэдадні паездкі ў Бялград асобе Руслана аддавалася шмат увагі, а шанцы на посьпех ацэньваліся як вельмі высокія. Гэткім жа настроем была прасякнутая большасьць выказваньняў і падчас тэлемосту зь Бялградам у рамках ток-шоў “Ход у адказ”. Агульная думка зводзілася да таго, што прадстаўніка Беларусі ня здолелі ацаніць належным чынам, і ў фінал прайшлі артысты, якія саступалі Руслану ў клясе.
Сьпевакоў – шмат, а прафэсіяналаў бракуе
Ці ня тым тлумачацца сьціплыя вынікі на “Эўрабачаньні”, што агульны ўзровень беларускай папулярнай песьні у цэлым ніжэйшы за ўзровень 1980-90-х гадоў мінулага стагодзьдзя? З такім пытаньнем я зьвярнуўся да музыказнаўцы Элеаноры Язерскай.
“Я часта сумую па тым, што цяпер няма мастацкіх радаў. Бо тое, што часта праходзіць у эфір, не вытрымлівае аніякай крытыкі і можа называцца чым заўгодна, толькі ня музыкай. Летась, я лічу, вельмі ўдала выступіў Калдун. Руслан Аляхно – гэта ня Дзьмітры Калдун. Ён яму саступае ва ўсім. Аляхно Руслан мог быць у фінале, нягледзячы на ўсе свае недахопы: гэта залішняя скаванасьць і, вядома, не заўсёды ён трапляў ва ўсе ноты”.
“Іншы кампот...”
Юры Саваш, кампазытар і аранжавальнік, прадусар Ірыны Дарафеевай, не аднойчы рыхтаваў розных выканаўцаў да конкурсаў. Вось на якія пралікі каманды Руслана Аляхно ён зьвярнуў увагу:
“Сам па сабе конкурс “Эўрабачаньня” шмат у якіх краінах ня лічыцца прэстыжным. Таму й робяць яго як сьцёб, адвязнае шоў. А ў нас у адборачным туры такі матэрыял, як правіла, не праходзіць. То бок, ад нас чакаюць абсалютна прафэсійнага выкананьня зь нейкімі вельмі прафэсійнымі аранжаваньнямі. Але ўзровень нашых выканаўцаў дастаткова далёкі ад сярэдняга ўзроўню эўрапейскіх выканаўцаў. Я думаю, што да гэтага фэстывалю падыходзяць з тымі ж меркамі, як, напрыклад, да адборачнага туру “Славянскага базару”. Але ж гэта ўжо зусім іншы кампот”.
“Касіць” у нас ня ўмеюць...”
За чатыры гады, як беларускія выканаўцы імкнуцца заняць прызавое месца на “Эўрабачаньні”, толькі Аляксандра і Канстанцін адзін куплет конкурснай песьні прасьпявалі на беларускай мове. У моўным пытаньні Юры Выдронак, лідэр гурту “Юр'я”, стаіць на катэгарычных пазыцыях:
“Толькі на беларускай мове, выключна! Гэта вельмі мэлядычная мова, больш мэлядычная нават за ангельскую. У нас аранжавальнікі, якія робяць гэтую папсу, рабіць гэтага ня ўмеюць, – гэта ўсё другаякаснае і гэта ўсё канкрэтны “закос” пад MTV. “Касіць” у нас ня ўмеюць. З адной простай прычыны: ніхто зь іх ня езьдзіць за мяжу. Ну як Ціхановіч ці Кіркораў могуць ведаць, як тое рабіць?! Артыст, які выходзіць на сцэну, калі хоць бы ў Польшчы падыме залю, тады ён можа ехаць на “Эўрабачаньне”.
Чацьвёрты год запар беларускія сьпевакі ўдзельнічаюць у конкурсе “Эўрабачаньне”. І толькі летась Дзьмітры Калдун здолеў заняць высокае шостае месца. Сёлета яшчэ падчас нацыянальнага адборачнага туру адна зь ягоных удзельніц, сьпявачка Гюнэш, публічна зьвярнула ўвагу на вакальныя хібы Руслана Аляхно і параіла яму папрацаваць над вакальнай тэхнікай.
