Аўтары праекту – паэты Зьміцер Арцюх і Аксана Спрынчан, якія аб'ядналі пачаткі сваіх прозьвішчаў у назьве паэтычнага тэатру «Арт.С». Дзея ладзілася да 200-годзьдзя клясыка беларускай літаратуры 19 лютага ў менскай бібліятэцы імя Цёткі.
Імпрэзу аздабляла старадаўняя беларуская музыка ў выкананьні Яраша Малішэўскага.
Зоркай імпрэзы сталася народная артыстка Беларусі акторка Купалаўскага тэатру Марыя Захарэвіч, якая чытала верш Янкі Купалы “Памяці Вінцука Марцінкевіча”.
Цягам імпрэзы перад публікай зьяўляліся сапраўдныя і прыдуманыя пэрсанажы твораў Дуніна-Марцінкевіча. Пра ідэю спэктаклю "Ну й "Залёты" ў "Пінскай шляхты" распавядае паэтка Аксана Спрынчан:
“Паэтычны тэатар “Арт.С” ладзіць вечарыны імпрэзы і прыдуманыя спэктаклі. Канешне гэта не спэктакль, і ў той жа час ёсьць элемэнты спэктаклю: ёсьць героі. Яны не граюць як у тэатры, але яны выяўляюць сябе і сваё стаўленьне да Дуніна-Марцінкевіча згодна тых роляў, якія ім дадзеныя. Гэта нейкія моманты з гісторыі часоў Дуніна-Марцінкевіча, зь ягонай творчасьці”.
Аксана Спрынчан заўважае, што паэтычны тэатар зьвяртаецца ня толькі да клясыкі, але і да творчасьці сучасных аўтараў.
