Сяргей Будкін

Сяргей, ты ніколі не жадаў займацца аўтамадэлізмам?

Не маё, аддаю перавагу больш цікавым як для мяне справам:)

Вашыя адносіны да паходу нашых рок-ідалаў у адміністрацыю прэзыдэнта.

Сам факт сустрэчы наўрад ці можа выклікаць нейкія нараканьні. Патрэба высьветліць, на якім сьвеце знаходзіцца беларускі рок вісела ў паветры больш за тры гады. Адзіная бяда, што музыкі між сабой не скаардынаваліся, не дамовіліся што канкрэтна казаць грамадзкасьці, з чаго і ўсчаўся вэрхал. Але ў дадзенай сфэры па выніку кожнае абмеркаваньне, кожная спрэчка, а тым больш скандал - толькі на карысьць музыкам.

Сяргей, ці не падаецца Вам, што на Тузіне звычайна выйграюць гурты, якіх нармальны чалавек слухаць ня будзе. А неблагія песьні вышэй за перадапошняе месца не ўзьнімаюцца? Можа адлік лепей весьці з канца "турнірнай" табліцы? Дзякуй.

Неаднойчы казалася пра тое, што месцы ў "турнірнай табліцы" -- вялікая ўмоўнасьць. Музыка -- ня спорт. Галоўная задача чарту на ТГ - знаёміць слухачоў з самымі сьвежымі, актуальнымі і цікавымі кампазыцыямі. Мае ж асабістыя густы таксама даволі часта не адпавядаюць выбару наведнікаў, але кожнаму сваё – “Таварыш Маўзэр” кранае сэрцы нашай аўдыторыі куды болей за “Камэрату”, гэта аб'ектыўная дадзенасьць:). Вялікая роля, заўважце, і ў згуртаванасьці прыхільнікаў таго ці іншага выканаўцы. У таго ж “Маўзэра” - і сайт, і фэн-кам'юніці ёсьць, а ў “Камэраты” - толькі працоўны кабінэт у філярмоніі...

каго з сённяшніх рок-гуртоў можна было б прадставіць як аблічча Беларусі?

У рэдакцыі ТГ часьцяком пра гэта пытаюцца, асабліва замежныя прадусары. Летась мы адказалі арганізатарам літоўскага фэсту be2gether, што гэта могуць быць Iq48, NRM і "Ляпіс Трубяцкой". Самае цікавае, што сапраўды ёсьць з чаго абіраць і ёсьць што паказаць, асабліва тое датычна цяжкай музыкі і фолку (фолк-мадэрну).

Беларускі рок памёр?

Не сказаў бы.

Сірога, трымайся, Лёлік табе гэта не даруе!

Чым вы цікавіцеся ў жыцці, акрамя музыкі? :) Хобі, захапленні...

Сям'я займае першае месца. А цікавіцца даводзіцца ўсім - прафэсія такая. Другое ж захапленьне пасьля музыкі хутчэй за ўсё літаратура беларуская, асабліва 20-30 гадоў XX ст. - Зарэцкі, Ластоўскі, Гарэцкі, Мрый, паэзія Жылкі. І, пэўна яшчэ назваў бы кіно - добрае, якаснае ды ўдумлівае (Фэліні, Бэрталючы, Лінч, Джармуш, Кубрык).

Сяргей, як Вы ставiцiся до беларускамоуных блюзавых гуртоу (напрыклад, "Мадера Хард Блюз")? Якi cэнс бычыце зараз наогул у блюзе? Можа гэта пратэст супратиу РБ папсы?

Ну, скажам "Мадэра хард блюз" мае ў сваім рэпэртуары толькі адну беларускамоўную песьню (яна неяк удзельнічала ў нашым чарце), а колісь прасоўвалася пад слёганам "настояшчій русскій блюз", хоць іх лідэр Юры Міхайлаў - чалавек правільны. Вельмі цікавыя рэчы ў гэтым кірунку робяць Свет Бугі Бэнд і Юры Несьцярэнка. Гэта такі кірунак, да якога найбольш пасуе азначэньне "музыка душы". А папсу можна назваць "музыкай цела"-:). Нейкім пратэстам супраць папсы можна было бы назваць, але хутчэй нясьведамым.

Ці не было б лепей праводзіць рэйтынгі на Тузіне паасобку для рок- ды поп-музыкі? А то цяпер вынікі адлюстроўваюць больш музычныя густы наведвальнікоў сайту, чым папулярнасць самых песень.

...Больш за тое, у нашых плянах разьвесьці таксама іншыя кірункі музыкі - стварыць асобны фолк-чарт, хіп-хоп-чарт, "цяжкі" чарт, мо нават і бардаўскі. Пакуль жа маем агульны гіт-парад і ня бачу анічога кепскага ў тым, што яго вынікі "адлюстроўваюць музычныя густы наведвальнікоў сайту".

З вашага сайту можна спампаваць добрую беларускую музыку, але пра гэта мала хто ведае нават у Беларусі, пагатоў за мяжой. Я разумею, Вам прыемна быць міжвольным манапалістам у гэтай справе. Але хацелася б, каб беларускую музыку ведалі шырэй - знаходзілі на розных сайтах. На ўкраінскіх і расійскіх. Заўважыў, што ўкраінцы не саромеюцца запампоўваць сваю музыку на расійскія сайты - варта пра тое падумаць і прамоўтэрам беларускай музыкі.

Ня ведаю, чым вы кіруецеся, калі кажаце, што пра ТГ мала хто ведае, пагатоў за мяжой. У мяне крыху іншая інфармацыя: цягам мінулага году на наш сайт зайшлі 200 000 чалавек, а штомесяц песьні, зьмешчаныя ў нас, спампоўваюць ля 50 000 разоў. Прычым заходзяць шмат людзей з іншых краінаў, асабліва суседніх ды ЗША. Скажу яшчэ, што сёньня на “Тузіне Гітоў” працуюць навігацыйныя вэрсіі на ангельскай, расейскай, польскай, украінскай і швэдзкай мовах. А запампоўваць музыку беларускіх выканаўцаў на расейскія сайты – гэта, па-першае, парушэньне аўтарскіх правоў, калі не падпісваць аніякіх папераў, а па-другое справа неўдзячная.

Як вы ставіцеся да сённяшніх апазіцыйных палітыкаў, якія нічым не паспрыялі развіццё беларускага року

Ну як так нічым? А культурніцкія ініцыятывы БНФ? А падтрымка (хай сабе і маральная) з боку Мілінкевіча? Сама пастаноўка пытаньня падаецца ня надта слушнай - палітыкі мусяць займацца сваёй справай, музыкі - сваёй. Тым больш шмат хто з айчынных выканаўцаў і ня хоча завязвацца з палітыкай. Што да майго стаўленьня, то крыху бянтэжыць адсутнасьць нейкай пераемнасьці, практычная адсутнасьць новых яркіх асобаў. Паглядзіце архівы той жа Свабоды і Хартыі: пра што вялося, скажам, шэсьць год таму, тое і засталося актуальным па сёньня, пры тым гульцы на палітычным поле таксама тыя ж самыя...

Ці маюць беларускія рок-гурты шанец на эўрапэйскае прызнаньне і пры якіх умовах (пагодзімся, штоваршаўскія канцэрты Н.Р.М. -- гэта даніна хутчэй апазыцыі, чым музыкам).

Дарма вы так пра N.R.M. Якраз у Польшчы яны маюць не абы-якую вядомасьць. І ўжо ня дзівішся нават польскаму памежніку, які пытаецца: "Беларусь?", а потым пачынае напяваць "Гэй, ля-ля-ля, ты не чакай...":-). N.R.M. мела сумесны тур з Pidzhama Porno па Польшчы, у іх там нават сваё прадстаўніцтва ёсьць. Што да агульнасусьветнага прызнаньня, дык гэта справа часу. Часу і грошай. Як толькі белшоў-біз будзе функцыянаваць па сусьветных законах, тады і будзе нам шчасьце...

Прывітаньне,Сяргей! Мяне заўсёды цікавіла і ўражвала: ты так шмат працуеш... Ці знаходзіш час для адпачынку? Як ты ўвогуле адпачываеш? Маючы вельмі прыгожую жонку і цудоўнейшае дзіця, ці шмат часу ты праводзіш у сямейным коле? І апошняе - ці зьбіраесься ты выхоўваць свайго нашчадка ў беларускіх традыцыях, прывучаць да беларускай мовы, музыкі?;) Загадзя дзякуй і віншую з нагоды рэлізу "ПТ-2007". Посьпехаў!

Дзякуй за добрыя словы! Час для адпачынку ёсьцека, з той нагоды ў сваёй хаце інтэрнэт і не праводжу:). Найлепшы адпачынак - у сямейным коле і тая каштоўнасьць набывае яшчэ больш сэнс з увагі на тое, што даводзіцца шмат езьдзіць і мне, і жонцы (яна вучыцца ў Вільні). Выхаваньне ж дачунькі ў беларускіх традыцыях пачалося ад першага дня яе нараджэньня, бо яе бацькі - беларускамоўныя, ды і засынае яна часьцяком пад калыханкі Янкі Маўзэра і Вайцюшкевіча:).

Што магло б пераламіць сытуацыю на эстрадзе РБ, дзе палітыку вызначае расейская прысутнасьць (мара выканаўцы - праславіцца ў Маскве).

Найперш дзяржаўная палітыка ў дачыненьні да сваёй мовы, культуры і гісторыі. Калі будзе створана "мода на сваё", тады і некаторыя выканаўцы задумаюцца: ці ня лепей прасоўваць нешта Ўласнае, а не рабіць нейкія калькаваныя прыпадабненьні да расейцаў. Пакуль жа поп-прадусары сыходзяць з таго, што беларускамоўныя песьні - нефармат, а значыць прадавацца такі прадукт будзе горш. І зноў жа -- фармаваньне сваёй структуры шоў-бізу, тады сэнсу лезьці ў Маскву будзе меней. Але я асабіста не бачу анічога заганнага ў імкненьні выканаўцаў выйсьці за межы сваёй краіны -- Масква тое, Кіеў альбо Лёндан, -- тут не істотна.

Сягей, перамога менскага хлапца на дзіцячым Эўрабачантьні - гэта на карысьць беларускай эстрадзе ці лукашэнкаваму рэжыму?

Гэта проста перамога на песенным конкурсе, якіх па ўсім сьвеце - сотні. Мяркую, што ня варта тут казаць пра нейкую карысьць эстрадзе альбо рэжыму - выканаўца здолеў запаліць на сцэне -- малайчына, але глябальную падзею з таго рабіць навошта?

Чаго бракуе беларускаму Інтэрнэту?

Крэатыўнасьці, рэклямы, жаўцізны, вельмі часта апэратыўнасьці. Праблема таксама ў практычнай адсутнасьці выбару. Сам факт, што ў ТГ няма аніводнага (!) канкурэнта тут яскравае сьведчаньне.

Завяршаем нашую онлайн-канфэрэнцыю.

Жадаю слухачам Свабоды і наведнікам вэбсайту, найперш, шанаваць сваё і рабіць гэта па-свойму. Быць адэкватнымі. І аптымістычна глядзець у будучыню!

прывітанне Сяргей,як Вы ставіціся да гурта Крамбамбуля?непадаецца Вам,што гэта лепшы беларускі "прадукт"?

прывітанне Сяргей,як Вы ставіціся да гурта Крамбамбуля?непадаецца Вам,што гэта лепшы беларускі "прадукт"?

Як у нашых умовах удалося правесьці добрачынны канцэрт памяці Анатоля Сыса? Гэта цуд? Ці ўсё можна зрабіць, калі мець жаданьне?