«Стоп-падатак-3». Жывы рэпартаж

Міліцыянты зьехалі з Кастрычніцкай плошчы. Засталася дзяжурыць адна машына.

Міліцыянты грузяцца па машынах і зьяжджаюць зь месцаў, дзе плянавалася акцыя.

На Кастрычніцкай плошчы ажно 4 машыны ДАІ. І гэта пры тым, што сама плошча амаль пустая, людзей няма.

Пакуль ніякіх сыгналаў пратэсту на праспэкце не чуваць.

Супрацоўнікаў ДАІ паболела. Яны цяпер стаяць літаральна праз кожныя 50 мэтраў.

На праспэкце Незалежнасьці ў раёне плошчы Перамогі — ніякіх прыкметаў акцыі.

Аўтамабільны рух інтэнсіўны, але без затораў.

Кіроўцы пакуль не сігналяць.

Уздоўж праезнай часткі — шмат супрацоўніка ДАІ.

Таксама можна пабачыць людзей у цывільным.

Уладальнікаў аўто заклікаюць незадоўга да 18.00 выяжджаць на прылеглыя да праспэкту Незалежнасьці вуліцы, каб іх заблякаваць, ехаць павольна і роўна а 18.00 падаць працяглы гукавы сыгнал.

Мяркуецца, што а 18.30 удзельнікі акцыі трапяць на праспэкт Незалежнасьці, каб роўна а 18.30 зноў падаць працяглы гукавы сыгнал.

Ананімныя арганізатары акцыі заклікаюць да ўдзелу і пешаходаў, якія могуць выйсьці на ходнікі ўздоўж праспэкту Незалежнасьці і раскідаць там дробныя купюры, каб пакпіць з уладаў, якія ўвялі новую дзяржпошліну.

Папярэднія акцыі «Стоп-падатак» арганізоўваліся 20 і 27 сьнежня.