13 сьнежня «Арт Сядзіба» пры падтрымцы Беларускага саюзу мастакоў праводзіць «Дзень вышыванкі» — другі ў гэтым годзе фэстываль беларускай культуры. Сьвята пройдзе ў менскім Палацы Мастацтва (вул. Казлова, 3).
У суботу 13 сьнежня зь 15.00 да 22.00 у холе Палаца Мастацтва будзе працаваць кірмаш традыцыйных і сучасных вышыванак, адзеньня і сувэніраў ад папулярных моладзевых брэндаў, разнастайных вырабаў рамесьнікаў і майстроў, а ў гэты час у канферэнц-залі будуць праходзіць майстар-клясы, конкурсы, прэзэнтацыі ды музычныя выступы беларускіх гуртоў.
Уваход на мерапрыемства вольны.
Праграма фэстывалю «Дзень вышыванкі» складаецца з трох частак, якія будуць адбывацца паралельна:
— адукацыйная:
- прэзэнтацыя па гісторыі і тэхналёгіі вырабу вышыванкі;
- майстар-клясы па ткацтву, выцінанцы ды іншых народных рамёствах;
- лекцыі па этнаграфіі, народным і сучасным мастацтве;
— забаўляльная:
- зона беларускіх настольных гульняў;
- нацыянальныя бодзі-арт і тату;
- раздача стужак зь беларускім арнамэнтам;
- шматлікія конкурсы і падарункі;
- музычны канцэрт беларускіх гуртоў;
- іншыя цікавосткі.
— кірмаш:
- будуць прадстаўленыя вышыванкі, вопратка і адзеньне з народным арнамэнтам, упрыгожваньні і сувэніры з нацыянальным калярытам ад беларускіх вытворцаў.
Арганізатары чакаюць прапановы ад майстроў, профільных спэцыялістаў, этнографаў, ткачоў, рамесьнікаў, гуртоў, музыкаў ды іншых для напаўненьня праграмы адукацыйнай і забаўляльнай частак на электронны адрас artsiadziba@gmail.com ці па нумары +375297828881.
Для ўдзелу ў кірмашы на «Дні вышыванкі» запрашаюцца вытворцы вышыванак, беларускай вопраткі і адзеньня, упрыгожваньняў і сувэніраў з нацыянальнай беларускай адметнасьцю.
