Свабода ўзяла камэнтар у прадстаўніка ААТ «Мілкавіта» ў Хойніках наконт публікацыі агенцтва АР аб перавышэньні радыяцыйных нормаў у малацэ, якое паступае ім на перапрацоўку.
Начальнік Палескага вытворчага ўчастку ААТ «Мілкавіта» ў Хойніках Альберт Дравіла назваў «поўнай лухтой» паведамленьне агенцтва Аssociated Press пра дзесяцікротнае перавышэньне дапушчальнага ўзроўню радыеактыўнага стронцыю-90 у малацэ, якое фэрмэр Мікалай Чубянок вырабляе на ўскрайку чарнобыльскай зоны адчужэньня і прадае ўчастку для вытворчасьці сыру «Пармэзан».
«Я б яшчэ выказаўся мацней, калі б сакратаркі побач не было», — дадаў Альберт Дравіла падчас тэлефоннай размовы.
«А наагул фэрмэр Чубянок малако на ваш участак пастаўляе?»
«Канечне. Ёсьць такі фэрмэр, пастаўляе».
«Добра, а фэрма яго дзе знаходзіцца? Пішуць, у Губарэвічах?»
«Вось гэтага я ня ведаю, не магу сказаць, дзе ён разьмешчаны».
Кіраўнік участку кажа, што ў іх на вытворчасьці існуе радыелягічны кантроль, і малако зь перавышэньнем утрыманьня стронцыю ў дзесяць разоў прайсьці яго ня можа.
Сыравінная зона ўчастку АТТ «Мілкавіта» — калгасы і саўгасы, якія мяжуюць з Палескім дзяржаўным радыяцыйна-экалягічным запаведнікам. Ён утвораны на землях, куды выпала найбольш радыеізатопаў, у тым ліку й доўгажывучых. Карэспандэнт Свабоды спытаў у кіраўніка, якія самыя высокія ўзроўні стронцыю фіксуе вытворчая лябараторыя.
«Сказаць не магу. Падавайце пісьмовы запыт, адкажам. Перавышэньняў дапушчальных узроўняў утрыманьня радыенуклідаў ні па стронцыі, ні па цэзіі ў нас не бывае. Мы кіруемся нашымі беларускімі нарматывамі і нарматывамі, закладзенымі ў Тэхрэглямэнце Мытнага саюзу. Нарматывы Мытнага саюзу больш лагодныя, але мы прытрымліваемся сваіх, беларускіх. Але ўся інфармацыя — на запыт, а то сказаў нешта фэрмэр, а панапісвалі чорт ведае чаго.
Ужо тая лябараторыя, у якую карэспандэнты здавалі малако, дасылае нам абвяржэньні».
Карэспандэнты Аssociated Press узялі з сабою з фэрмы Мікалая Чубянка бутэльку малака й перадалі яго на дасьледаваньне ў Менскі цэнтар гігіены і эпідэміялёгіі. Падчас праверкі выявілася, што актыўнасьць стронцыю-90 у малацэ складае 37,5 Бк/кг, хоць паводле дзяржаўных санітарных нормаў яна ў малочных прадуктах не павінна перавышаць 3,7 бэкерэля на кіляграм.
Кіраўніцтва АТТ «Мілкавіта», як паведамляюць журналісты Аssociated Press, палічыла вынікі дасьледаваньня «немагчымымі».
