Пра гэта паведамілі Reuters некалькі амэрыканскіх чыноўнікаў.
Чыноўнікі, якія выступалі на ўмовах ананімнасьці, заявілі, што канчатковае рашэньне аб увядзеньні санкцыяў пакуль не прынятае. Гэтыя захады могуць яшчэ больш ускладніць адносіны з Расеяй і азмрочыць дзяржаўны візыт старшыні КНР Сі Цзіньпіна ў ЗША ў верасьні.
Washington Post стала першым выданьнем, якое паведаміла, што адміністрацыя Абамы разглядае магчымасьць санкцыяў супраць кітайскіх фізычных і юрыдычных асобаў. Газэта адзначыла, што гэта можа адбыцца ў бліжэйшыя тыдні і згадала, што пад санкцыямі могуць таксама апынуцца грамадзяне і кампаніі іншых краінаў. Пры гэтым у артыкуле ня згадвалася Расея.
На думку крыніц Reuters, увядзеньне санкцыяў супраць кітайскіх кампаніяў або грамадзянаў да візыту Сі Цзіньпіна магчымае, але малаверагоднае, паколькі гэта можа ўскладніць саміт, у праграму якога ўключаны дзяржаўны абед у Белым доме ад імя прэзыдэнта Барака Абамы.
Прадстаўнік кітайскай амбасады ў ЗША Чжу Хайцюань заявіў, што Пэкін разьлічвае на ўмацаваньне дыялёгу і супрацоўніцтва са Злучанымі Штатамі, а «беспадстаўныя спэкуляцыі, шуміха і абвінавачваньні не спрыяюць вырашэньню праблемы».
Расейская амбасада не адказала на просьбу Reuters аб камэнтары.
Прадстаўнік Белага дома Джош Эрнэст адмовіўся пацьвердзіць, што ЗША вывучаюць магчымасьць увядзеньня санкцыяў супраць кітайскіх грамадзянаў і кампаніяў, адзначыўшы, аднак, што заклапочанасьць ЗША праблемамі кібэрбясьпекі «не зьяўляецца сюрпрызам» для Пэкіна.
«Было б стратэгічна неразумна з нашага боку абмяркоўваць патэнцыйныя аб’екты санкцыяў, таму што гэта толькі дасьць патэнцыйным аб’ектам санкцыяў магчымасьць зрабіць крокі, якія дазволяць ім пазьбегнуць гэтых санкцыяў», — заявіў ён журналістам на борце прэзыдэнцкага самалёта ў панядзелак.
