Сустаршыня Маладога Фронту Мiкалай Дземiдзенка адзначыў:
«Вiталя ведала шмат беларусаў, якія прайшлі праз Майдан. Мы пазнаёміліся ў сьнежні 2013, калі рабілі беларускі штаб, што месьціўся ў будынку Кіеўскай рады».
Мікалай распавёў, што Віталь, хоць і меў уласны бізнэс, але шмат часу і сродкаў ахвяраваў Майдану, ахоўваў будынак Рады.
«Я захапляўся гэтым чалавекам», — сказаў Дземідзенка. У ягонай кватэры беларусы заўжды знаходзілі начлег і ежу.
Ціліжанка быў першым украінцам у складзе тактычнай групы «Беларусь». Так атрымалася, што на Майдане першымі загінулі армянін і беларус. А ў тактычнай групе "Беларусь" — украінец», — сказаў Дземідзенка.
Віталь Ціліжэнка загінуў 10 жніўня.
Мікалай Дземідзенка распавёў пра стан беларускага добраахвотніка пад пазыўным Тарас, які знаходзіўся разам з Ціліжэнкам і быў цяжка паранены.
Вечар памяцi Вiталя Целяжэнкi. Збор сродкаў на лекі «Тарасу»
Стан хлопца вельмі цяжкі, ён выйшаў з комы, але знаходзіцца на апараце штучнай вэнтыляцыі лёгкіх.
«У нас на ўсю Беларусь ёсьць адзін паранены добраахвотнік, — сказаў Дземідзенка. — Мы можам яму дапамагчы».
«Нагода, зь якой мы сабраліся, — гэта адна сьмерць і адно жыцьцё», — Павал Севярынец паведаміў, што параненаму беларусу няма яшчэ 30 год, яго цела пасечанае аскепкамі, якія немагчыма выняць з-за цяжкага стану. Хлопец перажыў дзьве комы.
Севярынец зазначыў, што беларускія добраахвотнікі ва Ўкраіне ня маюць аніякага статусу, у іх няма віду на жыхарства і яны ніяк ня могуць вярнуцца ў Беларусь.
«У гэтай сытуацыі абараніць іх могуць толькі Госпад Бог і Беларусь».
Паводле Севярынца, хлопца трэба перавезьці да месца, дзе яму акажуць больш кваліфікаваную дапамогу.
Было абвешчана, як можна падтрымаць беларусаў, якія патрабуюць дапамогі ў выніку падзеяў ва Ўкраіне.
Вечарына скончылася выкананьнем гімну Ўкраіны і беларускага гімну «Магутны Божа».
