Каля амбасады Расейскай Фэдэрацыі затрыманыя грамадзкія актывісткі, якія ладзілі пэрформанс супраць мотапрабегу «Начных ваўкоў».
Акцыю здымалі незалежныя журналісты. У іх міліцыянты перапісалі пашпартныя зьвесткі, а затым адпусьцілі. Актывістак Вольгу Нікалайчык і Кацярыну Садоўскую затрымалі і павезьлі на аўтатранспарце МУС у невядомым кірунку. На дадзены момант іх тэлефоны недасяжныя. Прычыны затрыманьня і месцазнаходжаньне актывістак высьвятляюцца.
Яшчэ адна ўдзельніца пэрформансу, актывістка Партыі БНФ Кацярына Рамашкевіч апавяла Свабодзе, як адбылося затрыманьне.
«Мы аднесьлі імправізаваную касмэтычку да амбасады Расеі ў знак таго, што мы пратэстуем супраць мотапрабегу „Начных ваўкоў“. Мы хочам, каб яны забралі сваю касмэтычку. Зразумела, што гэта зьвязана з мэмам, які стаў папулярным у інтэрнэце цягам апошніх дзён. Мы пакінулі касмэтычку каля ўваходу і сказалі ў дамафон: „Забярыце рэчы і перадайце вашым ваўкам“. Пасьля гэтага мы пайшлі ад амбасады. Я пайшла трохі раней, і калі азірнулася, то ўбачыла, што ў іншых удзельнікаў акцыі міліцыянты правяраюць пашпарты. Я зайшла ў краму, а калі выйшла, то не пабачыла сваіх паплечніц. Сувязі зь імі няма».
Паводле Кацярыны Рамашкевіч, «касмэтычка» ўяўляе сабой вялікі празрысты пакунак, у які паклалі маленькія касмэтычкі, памаду, некалькі пакункаў ценяў для вачэй, пілачкі для пазногцяў, карункавыя кофтачкі і жаночы абутак.
«Вядома, гэтая перадача касмэтычкі — гэта зьдзек. Сутнасьць пэрформансу ў тым, што нібыта мы знайшлі гэтыя рэчы на Кургане Славы пасьля таго, як яго наведалі „Начныя ваўкі“. Яны самі пасьля казалі, што на польскай мяжы ў іх аглядалі ўсе іхнія касмэтычкі. Дык мы хацелі сказаць, што адну яны забылі ў Беларусі. Вядома, гэта мэтафарычна. Сэнс акцыі ў тым, што мы супраць мотапрабегу і хочам, каб „Начныя ваўкі“ зьехалі з нашай зямлі разам са сваімі касмэтычкамі».
