21 лютага ў Беларусі традыцыйна адзначаецца Дзень роднай мовы. Гэты дзень стаў сьвятам беларускай мовы, хоць і быў заснаваны ЮНЭСКА ў 1999-м годзе і падтрыманы Гэнэральнай Асамблеяй ААН як Міжнародны дзень роднай мовы.
Радыё Свабода разам з удзельнікамі конкурсу «Віншуем па-беларуску!» не магло застацца абыякавым і сёньня прэзэнтуе найлепшыя конкурсныя працы, а таксама паштоўкі пераможцаў, якія ўжо надрукаваныя і чакаюць вашых марак ды пажаданьняў.
Пераможцам конкурсу стала Настасься Дыро. Яна будзе ўрачыста ўзнагароджаная 22 лютага на «Сьвяце роднай мовы» ў Менску ды атрымае абяцаную намі электронную чыталку «Kindle».
Рэдакцыя Радыё Свабода вырашыла ўзнагародзіць каштоўным падарункам, плэерам iPod shuffle, і яшчэ адну аўтарку паштоўкі з вобразам Вершніцы — Юлію Галавіну.
Вершніца — вобраз, раcпрацаваны для вокладкi кнiгi Алеся Плоткі «Байсан». Як кажа паэт — гэта муза, якая застанецца ў вечнасьцi пасьля сьмерці аўтара. Ідэя: Алесь Плотка. Эскіз вобразу: Ліза Пастушэнка.
Гэты дзьве паштоўкі ўжо надрукаваныя і будуць прэзэнтаваныя 22 лютага на «Сьвяце роднай мовы».
Кожны ахвотны зможа атрымаць паштоўкі і на іншых мерапрыемствах Радыё Свабода. Бліжэйшае — 25 лютага ў кнігарня «логвінаЎ», прэзэнтацыя новай кнігі Аляксандра Лукашука «Дзясяты паверх». Пачатак а 19.00.
