Праваабаронцы: Беларусі патрэбны свой «сьпіс Магніцкага»

«Мы не забудзем!» — кампанію пад такой назвай пачалі маладзёвыя актывісты партыі БХД. 16 красавіка ў офісе БНФ прайшла вечарына памяці зьніклага амаль 14 гадоў таму былога міністра ўнутраных спраў Юрыя Захаранкі.

Празь месяц у межах кампаніі «Мы не забудзем!» адбудзецца вечарына памяці журналіста Зьмітра Завадзкага, потым — іншых зьніклых і тых, хто стаў ахвярай палітычных рэпрэсій ў Беларусі.

16-ты дзень месяца абраны як напамін пра штомесячныя акцыі салідарнасьці, якія былі вельмі папулярныя ў сярэдзіне мінулага дзесяцігоддзя, але потым сьцішыліся пад ціскам уладаў.

Адна з арганізатараў кампаніі Марына Хоміч назвала асноўную прычыну пачатку кампаніі памяці:

«Паводле беларускага закону, праз год скончыцца тэрмін даўніны злачынства адносна Юрыя Захаранкі, Віктара Ганчара, Анатоля Красоўскага. Яшчэ праз год і справу Зьмітра Завадзкага закрыюць і здадуць у архіў. У грамадзтва амаль не засталося часу, каб дамагчыся ад уладаў актыўнага расьсьледаваньня спраў і адказу на пытаньне, што стала з гэтымі людзьмі. Таму мы пачынаем агульнанацыянальную кампанію памяці зьніклых».


Былы сьледчы пракуратуры, праваабаронца Алег Воўчак на вечарыне апавёў пра барацьбу за тое, каб справа Юрыя Захаранкі была перакваліфікаваная і мела законныя падставы для падаўжэньня. Пакуль улады на такія прапановы не адказваюць, але праваабаронцы й апазыцыйныя палітыкі не спыняюць намаганьняў. Алег Воўчак нагадаў пра досьвед Аргентыны, дзе зараз каля 80 былых службоўцаў і сьледчых прыцягнутыя да крымінальнай адказнасьці за тое, што ў часы вайсковай дыктатуры нічога не зрабілі ў расьсьледаваньні спраў зьніклых апазыцыянэраў. Алег Воўчак мяркуе, што ў Беларусі мусіць зьявіцца сьпіс нядобрасумленных сьледчых у справах зьніклых, кшталту расейскага «сьпісу Магніцкага».

Удзельнікі вечарыны паставілі свае подпісы пад пэтыцыяй на адрас Генэральнай пракуратуры, якую склаў знаны праваабаронца Гары Паганяйла.