Лінкі ўнівэрсальнага доступу

Манэўры амбасадараў


Панядзелак, 8 красавіка, стане першым працоўным днём у Беларусі новага амбасадара Літвы Эвалдаса Ігнатавічуса.

Накіроўваючы яго на гэтую пасаду, прэзыдэнт Даля Грыбаўскайце заявіла, што Літва імкнецца ствараць з суседзямі канструктыўныя дачыненьні, якія грунтуюцца на эўрапейскіх прынцыпах.

Эвалдас Ігнатавічус
Эвалдас Ігнатавічус
Новаму амбасадару 46 гадоў. Але, нягледзячы на адносна малады ўзрост, ён мае вялікі дыпляматычны досьвед.У МЗС Літвы Эвалдас Ігнатавічус працуе з 1991 году. Ён быў віцэ-міністрам, статс-сакратаром, амбасадарам у Нямеччыне.

На высокі прафэсіяналізм новага амбасадара найперш зьвяртае ўвагу прафэсар зь Вільні Раймундас Лапата. Сёньня ў размове з карэспандэнтам «Свабоды» навуковец у галіне міжнародных дачыненьняў адзначыў:

«Амбасадар Эвалдас Ігнатавічус, які прыяжджае працаваць у Менск, — вельмі дасьведчаны дыплямат. І яго прызначэньне трэба расцэньваць як прыкмету таго, што літоўскае кіраўніцтва лічыць дачыненьні зь Беларусьсю вельмі важнымі. І наагул я хачу зьвярнуць увагу на тое, што амаль усе ранейшыя нашыя амбасадары, якія працавалі ў Беларусі, — гэта, як мы кажам, вельмі сур’ёзныя людзі. І таму я думаю, што і наш новы амбасадар будзе старацца працаваць па поўнай праграме».

Эвалдас Ігнатавічус валодае ангельскай, нямецкай, польскай і расейскай мовамі. Ён узнагароджаны крыжам камандора ордэна «За заслугі перад Літвой». У Менску ён заменіць Лінаса Лінкявічуса, які напрыканцы мінулага году ачоліў МЗС Літвы.

___________________________________________

Міхаіл Ежэль
Міхаіл Ежэль
Да працы ў Менску прыступае і новы амбасадар Украіны — Міхаіл Ежэль. Пра тое, што менавіта ён можа ачоліць дыпляматычнае прадстаўніцтва Ўкраіны ў Беларусі, «Свабода» пісала яшчэ 19 лютага ў матэрыяле «Ўкраіна прышле ў Беларусь амбасадара-адмірала». Так і сталася.

Міхаіл Ежэль нарадзіўся ў 1952 годзе. Ён адмірал запасу. З 2010 па 2012 гады быў міністрам абароны ва ўрадзе Мікалая Азарава.

Прызначэньне амбасадарам прафэсійнага вайскоўца, які ня мае дыпляматычнага досьведу, выглядае дзіўным. Былы амбасадар Украіны ў Беларусі Раман Бясьсьмертны адзначае:

«Калі паглядзець на супрацоўніцтва паміж нашымі краінамі, то 30% тут займае ваенна-прамысловы комплекс. І таму можна пагаджацца з актуальнасьцю гэтага прызначэньня. Хоць Міністэрства абароны ва Ўкраіне ня мае абсалютна ніякага дачыненьня да ВПК. У нас гэтым займаецца Міністэрства прамысловасьці, бо ўсе ваенныя заводы знаходзяцца ў падпарадкаваньні Міністэрства прамысловасьці».

А кіеўскі палітоляг Міхаіл Білецкі мяркуе так:

«У нашым МЗС, відаць, ня лічаць беларускі напрамак важным і рызыкоўным, ня лічаць Беларусь прыярытэтным вэктарам у зьнешняй палітыцы, таму і паставілі амбасадарам вайсковага чалавека. Для самога Ежэля гэта як ганаровая ссылка. Ён чалавек немалады, няхай дабірае рэшту стажу і цешыць сваё самалюбства».

Ускосна гэтае меркаваньне падмацоўваецца і тым, што ўжо паўгода дыпляматычная місія Ўкраіны ў Беларусі ня мае амбасадара. Папярэдні амбасадар Віктар Ціханаў летась быў абраны дэпутатам Вярхоўнай Рады, пасьля чаго пакінуў Беларусь.

________________________________________

Хутка зьявіцца ў Менску і яшчэ адзін новы амбасадар — Славаччыны. Паводле неафіцыйнай інфармацыі, у МЗС Славаччыны з гэтай кандыдатурай ужо вызначыліся. Але пакуль канкрэтнага прозьвішча вырашана не называць. Што тычыцца ранейшага амбасадара Мар’яна Серваткі, то ён пасьля адпачынку будзе працаваць у апараце міністэрства.

________________________________________

Стэфан Эрыксан
Стэфан Эрыксан
А самая загадкавая сытуацыя цяпер з амбасадай Швэцыі. У прыватных размовах некаторыя эўрапейскія палітыкі кажуць, што афіцыйны Менск дае згоду на вяртаньне швэдзкіх дыпляматаў у Беларусь. Аднак ставіць пры гэтым умову — міністра замежных спраў Беларусі Ўладзімера Макея трэба выкрасьліць з «чорнага сьпісу» неўязных у эўрапейскія краіны.

________________________________________

Што да беларускіх амбасадараў у названых краінах, дык тут сытуацыя выглядае так. Дыпмісію ў Літве ачольвае 65-гадовы Ўладзімер Дражын. На гэтай пасадзе ён зь сярэдзіны 2006 году.

Амбасадар Беларусі ва Ўкраіне — 68-гадовы Ўладзімер Вялічка. Ён свайго роду рэкардсмэн-доўгажыхар, бо знаходзіцца ў Кіеве аж з 2002 году.

Невялікую амбасаду Беларусі ў Славаччыне з восені 2010 году ачольвае прафэсійны дыплямат Уладзімер Серпікаў.

А амбасадарам Беларусі ў Швэцыю павінен быў ехаць добра вядомы многім журналістам Мікалай Барысевіч, які ў свой час працаваў прэсавым сакратаром і МЗС, і кіраўніка дзяржавы. Аднак пасьля высылкі зь Менску Стэфана Эрыксана швэдзкі бок адмовіўся прымаць новага кіраўніка дыпмісіі Беларусі.

Інтарэсы Швэцыі ў Беларусі зараз узяла на сябе амбасада Эстоніі ў Беларусі, а інтарэсы Беларусі ў Швэцыі — амбасада Беларусі ў Латвіі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG