На 12 кастрычніка ў Токіё адкрываецца штогадовае паседжаньне Рады кіраўнікоў Міжнароднага валютнага фонду і Ўсясьветнага банку. У Японію выправілася афіцыйная беларуская дэлегацыя, каб папрасіць у МВФ новы крэдыт
Афіцыйную дэлегацыю ачольвае міністар эканомікі Мікалай Снапкоў.
Ад Нацбанку паехаў намесьнік старшыні Юры Алымаў. А міністэрства фінансаў прадстаўляе намесьнік кіраўніка ведамства Максім Ермаловіч.
Раней у НБ запэўнівалі, што старшыня праўленьня Надзея Ермакова не плянавала ляцець у Японію. А вось у Мінфіне прызналі, што міністар Андрэй Харкавец зьбіраўся ў Токіё, аднак вымушаны быў застацца ў Беларусі, бо гэтымі днямі праходзіць зацьверджаньне бюджэт-2013.
Ермакова: Мы абмяркоўваем аднаўленьне перамоваў з МВФ
Надзея Ермакова
«Мы абмяркоўваем аднаўленьне перамоваў зь Міжнародным валютным фондам. Мы заявілі шэраг сустрэч на пачатку кастрычніка ў Токіё», — сказала старшыня праўленьня Нацбанку Беларусі Надзея Ермакова 12 верасьня.
Тады кіраўніца таксама дала зразумець, што пра аднаўленьне фінансавага супрацоўніцтва Беларусі з МВФ гаворка будзе весьціся таксама падчас візыту ў Менск місіі МВФ.
Чарговая місія МВФ будзе працаваць у Менску 18–29 кастрычніка.
2 кастрычніка міністар фінансаў Беларусі Андрэй Харкавец заявіў, што краіна гатовая выконваць новую крэдытную праграму Міжнароднага валютнага фонду.
Ён сказаў, што супрацоўніцтва з МВФ «не зьяўляецца для нас закрытай тэмай», але прызнаў што ў перамовах з гэтым фондам ёсьць складанасьці.
Муха: Неабходна нармалізаваць палітычныя адносіны паміж Беларусьсю, Эўразьвязам і ЗША
Якія шанцы ў Беларусі атрымаць чарговы крэдыт Міжнароднага валютнага фонду?
Аляксандар Муха
Аналітык дасьледчай групы BusinessForecast.by Аляксандар Муха мяркуе, што з эканамічнага гледзішча супрацоўніцтва беларускага ўраду і МВФ цалкам магчымае, а замінаюць рэалізацыі намераў палітычныя моманты:
«Калі ацэньваць верагоднасьць выдзяленьня крэдыту, то зараз нешта з дакладнасьцю сказаць досыць складана. Думаю, што з гледзішча эканамічнага парадку дня бакі цалкам могуць прыйсьці да кансэнсусу адносна асноўных пытаньняў унутранай эканамічнай палітыкі, уключна зь фіскальнай, манэтарнай палітыкай, рэалізацыяй структурных рэформаў і г.д.
Па сутнасьці, зараз для фактычнага запуску другой праграмы „стэнд-бай“ неабходна, у першую чаргу, нармалізаваць палітычныя адносіны паміж Беларусьсю, Эўразьвязам і ЗША. І ў гэтым выпадку, у выпадку паўнавартаснай нармалізацыі стасункаў у рамках згаданага трохкутніка, верагоднасьць запуску другой праграмы „стэнд-бай“ заўважна ўзрасьце. Але пытаньне палітычных узаемаадносінаў, хутчэй, не да мяне, я ўсё ж больш эканаміст, а не палітоляг. Але яшчэ раз паўтару, што з гледзішча эканамічнага беларускі ўрад і МВФ цалкам маглі б дамовіцца аб новай праграме».
Беларусь і МВФ: гісторыя крэдытаў і стасункаў
Пасьля звароту беларускіх уладаў Рада выканаўчых дырэктараў МВФ 12 студзеня 2009 году ўхваліла праграму тэрмінам на 15 месяцаў і выдзяленьне Беларусі фінансавых рэсурсаў у аб’ёме каля $2,46 млрд.
Пазьней на просьбу беларускага боку МВФ павялічыў агульны аб’ём фінансаваньня да $3,46 млрд.
За час з 1992 па 2008 год Беларусь двойчы скарыстала фінансавыя рэсурсы МВФ: па лініі фонду сыстэмных трансфармацыяў — $217,2 млн. і паводле мэханізму стэнд-бай — $77,4 млн. Абодва гэтыя крэдыты Беларусь цалкам пагасіла ў лютым 2005 году.
