У суд прапусьцілі ня ўсіх

Каля 20 актывістаў міліцыянты не прапусьцілі нават у двор будынку суду, і яны засталіся чакаць на вуліцы. Сярод іх — сябар незарэгістраванай арганізацыі “Малады фронт” Зьміцер Хведарук:

“Сказалі: мы цябе ўчора не пусьцілі, і сёньня цябе няма ў сьпісах. Так што ніхто ня пройдзе. Сказалі потым, што ім нібыта была дадзеная каманда, што заля поўная. І проста ня хочуць, каб людзі бачылі тое бясчынства, якое адбываецца на судовым працэсе, які чарговы раз ператварыўся ў фарс. Я прыходжу сюды трэці дзень, каб выказаць падтрымку тым людзям, якіх цяпер незаконна судзяць”.

У будынак суду міліцыянты прапусьцілі каля 20 маладых людзей, якія назвалі сябе “будучымі юрыстамі”. Тацяна Цішкевіч, якую судзьдзя выдаліла з залі, сказала:

“У залю суду па сьпісе нейкім незразумелым, па якім і нас прапускалі, правялі БРСМаўцаў. Проста прывезьлі на машыне маладых людзей. І яны занялі тры лаўкі ў залі паседжаньня. Пытаюся, хто вы? Яны кажуць — гледачы, прыехалі паглядзець”.

Тацяну Цішкевіч судзьдзя выдаліла за тое, што тая ўсьміхалася і перашэптвалася падчас прагляду відэаматэрыялаў. Хаця адвакат заявіў, што Тацяна нікому не перашкаджае:

“Гэта было вельмі забаўна, і там усе таксама ўсьміхаліся. Я нікому не перашкаджала, і калі я сьмяялася з паказаньняў сьведак ці зь відэа — там проста забаўныя карціны, моманты. Відэаматэрыялы поўнасьцю супярэчаць і паказаньням сьведак, і пратаколу, адпаведна зь якім нас зьвінавацілі”.

Некаторыя ўдзельнікі працэсу прыйшлі ў майках, на якіх напісана “Люблю Беларусь”. Антон Койпіш сказаў:

“Гэтая майка паказвае тое, за што нас фактычна судзяць. Бо нас судзяць менавіта за любоў да Беларусі, за тое, што нам ня ўсё роўна, што адбываецца тут з нашым народам, з нашай краінай”.

Аляксей Бондар апрануў майку з надпісам “Свабоду Андрэю”:

“Зараз пайшоў разгляд справы Андрэя Кіма, і хочацца ў гэты момант падтрымаць Андрэя хаця б так. Бо зараз пайшлі і сьведкі патрэбныя, то бок яны падводзяць яго пад артыкул. Таму гэта маральная падтрымка, бо яны яму рыхтуюць прысуд больш жорсткі”.

З палітыкаў, якія прысутнічалі на працэсе, — старшыня Партыі БНФ Лявон Баршчэўскі:

“Гэта ня ёсьць выкананьне дэмакратычных судовых працэдур. Відавочная дыскрымінацыя. Сьведак з аднаго боку слухаюць, з другога — не. Што можна пра такі суд сказаць? Ва ўсякім разе ня скажаш, што ён справядлівы і дакладны. І таму чакаць справядлівага прысуду я б ня стаў. Я стараюся заўсёды падтрымаць хаця б маральна людзей, якія аказваюцца пад перасьледам за іх перакананьні”.

Намесьнік старшыні БСДП (Грамада) Ігар Рынкевіч сказаў:

“Я нават галадаваў за тое, каб спынілі перасьлед гэтых хлопцаў. Два дні назіраю і разумею, што палітычна матываваны працэс. Аднабакова вядзецца як папярэдняе сьледзтва, так і судовае. І, вядома, цяжка спадзявацца на аб’ектыўнасьць і нейкі законны прысуд. Проста не магу ня быць тут, бо можна ганарыцца гэтымі хлопцамі”.