У піцерскім тэракце пацярпеў адзін беларус. Жывы, траўмы сярэдняй цяжкасьці

Паводле зьвестак Санкт-Пецярбурскага аддзяленьня беларускай амбасады, у выбуху ў піцерскім мэтро 3 красавіка пацярпеў адзін грамадзянін Беларусі.

Пагрозы жыцьцю пацярпелага няма. Яму зрабілі апэрацыю, стан сярэдняй ступені цяжкасьці. Сваякам пацярпелага паведамілі пра ягоны стан, іншых падрабязнасьцяў не прыводзіцца.

Сёньня ў мэтро Санкт-Пецярбургу адбыўся тэракт. Паводле Сьледчага камітэту Расеі, 10 чалавек загінулі. Распачатая крымінальная справа. Кіраўнік прэс-службы адміністрацыі губэрнатара Санкт-Пецярбургу паведамляе пра 50 пацярпелых.

Усяго ў выбуху, які расейскія сьледчыя і прадстаўнікі ўладаў ужо называюць тэрактам, загінулі сама меней 11 чалавек, паўсотні людзей параненыя. У Санкт-Пецярбургу абвешчаная трохдзённая жалоба.

Беларуская сьпявачка ў Піцеры пра тэракт: Успомніла выбух у менскім мэтро

Выбух адбыўся на перагоне між станцыямі «Сянная плошча» і «Тэхналягічны інстытут». У час выбуху да сустрэчы ў Санкт-Пецярбурзе рыхтаваліся Ўладзімір Пуцін і Аляксандар Лукашэнка. Сустрэчу не скасавалі, фармальная частка пачалася праз паўгадзіны пасьля выбуху.

Сустрэча цягнулася ад 15-й да 21 гадзіны. Кіраўнікі Беларусі і Расеі дамовіліся пра газ, стасункі з ЗША і ЭЗ, рэфінансаваньне даўгоў.