Жонка 92-гадовага прэзыдэнта Зымбабвэ Робэрта Мугабэ заявіла, што ейны муж настолькі папулярны, што пераможа нават пасьля сьмерці.
Грейс Мугабэ 51 год, і яна заўжды надзвычай аддана падтрымлівае свайго мужа. Выступаючы падчас мітынгу кіруючай партыі Zanu-PF у Бухеры, яна сказала:
«Аднойчы, калі бог вырашыць, што Мугабэ час памерці, ягоны труп зьявіцца сярод кандыдатаў у лістах для галасаваньня... І вы пабачыце, што людзі прагаласуюць за труп Мугабэ. Я сурʼёзна кажу вам — проста каб паказаць, як людзі любяць свайго прэзыдэнта».
Партыя падтрымала прэзыдэнта Мугабэ на выбарах наступнага году, але ў апошні час ён абмежаваў свае публічныя выступы, — паведамляе ВВС.
У верасьні мінулага году зьявіліся чуткі, што Мугабэ памёр, пасьля таго як ён перапыніў свой удзел у саміце Афрыканскага саюзу і паляцеў у Дубай праверыць здароўе. Пазьней Мугабэ пажартаваў, што ён сапраўды памёр, але ўваскрос.
Робэрт Мугабэ кіруе Зымбабве з 1980 году. Пост прэзыдэнта ён заняў у 1987. За гады кіраваньня Мугабэ Рэспубліка Зымбабвэ стала адной з самых бедных краінаў сьвету.
