«Мы ахвотна распачнём з дасьведчанай беларускай камандай „Белсату“ дыскусію, як зьмяніць гэты СМІ, каб ён мог знайсьці патрэбнага спонсара і прэстыж важнага сродку беларускай камунікацыі» — напісаў высокапастаўлены чыноўнік МЗС у артыкуле «МЗС глядзіць на ўсход. Карпатлівая нармалізацыя дачыненьняў зь Беларусьсю».
Марэк Зюлкоўскі мае пасаду, роўную намесьніку міністра замежных спраў, ён адказвае ў ведамстве за ўсходнюю палітыку Польшчы.
Як даведалася Свабода зь неафіцыйных крыніцаў, польскае МЗС цалкам спыняе фінансаваньне Белсату. У дадзены момант, як даведалася Свабода, Белсат часова фінансуе Польская грамадзкая тэлевізія TVP, часткай якой канал і зьяўляецца.
5 студзеня дырэктарка тэлеканалу Белсат Агнешка Рамашэўская сустрэлася з прэм’ер-міністаркаю Польшчы Бэатай Шыдла і паведаміла на сваім профілі ў Фэйсбуку наступнае:
«Думаю, што будзеце задаволеныя, як і я, навіною, якую я перадаю: пані прэм’ер запэўніла мяне і ўпаўнаважыла заявіць, што існаваньню Белсату нічога не пагражае. Найбліжэйшы месяц мы прысьвяцім абмеркаваньню далейшых прынцыпаў супрацоўніцтва з МЗС».
Паводле МЗС Польшчы, ад 2007 году агулам фінансаваньне тэлеканалу Белсат склала 157 млн злотых (за гэты час курс злотага вагаўся ад 2 да 4 за даляр ЗША). Гэта траціна ўсіх сродкаў, якія Польшча выдаткавала за гэты час на падтрымку дэмакратыі ў Беларусі.
25 студзеня дзяржсакратар МЗС Польшчы Марэк Зюлкоўскі сустрэўся з амбасадарам Беларусі ў Варшаве Аляксандрам Авяр'янавым. У польскі парлямэнт цяпер прыехала зь візытам дэлегацыя Палаты прадстаўнікоў Беларусі. Польскі візыт — першы ў гісторыі Палаты прадстаўнікоў— працягнецца да 2 лютага
