Загінулыя былі жыхарамі Бабруйску і Быхаўскага раёну. Іх знайшлі памерлымі 7 і 8 студзеня.
«Яны знойдзеныя на вуліцы пры мінусавай тэмпэратуры. Папярэдне сьмерць надышла праз ахаладжэньне. Канчатковая прычына будзе высьветлена пасьля правядзеньня судова-мэдыцынскай экспэртызы», — сказаў спэцыяліст цэнтру.
Паводле суразмоўцы, сытуацыя з абмарожаньнямі не крытычная.
«З улікам таго, што было пад трыццаць градусаў марозу, такую сытуацыю з пацярпелымі ад іх можна лічыць нармальнай. Гэта ў асноўным абмаражэньні рук, вушэй, ступняў. Сур’ёзных траўмаў не зафіксавана».
У магілёўскі траўмапункт за апошнія трое сутак дзесяць чалавек зьвярнуліся па дапамогу з абмарожаньнямі.
«Усе гэтыя выпадкі няцяжкія. Гэта абветрываньне ці абмарожаньне рук або ног. Сытуацыя не крытычная. З прычыны маразоў людзі меней стараюцца знаходзіцца на вуліцы і адпаведна меней атрымліваюць зімовых траўмаў», — паведаміў спэцыяліст траўмапункту.
Паводле абласнога ўпраўленьня Міністэрства надзвычайных сытуацыяў, значная частка пацярпелых ад маразоў была нападпітку. За апошнія суткі на пажарах загінула двое чалавек.
