Яны шлюць у Фэдэральную службу выкананьня пакараньняў патрабаваньні паведаміць пра месца знаходжаньня Ільдара Дадзіна, бо баяцца за ягонае жыцьцё і здароўе. Канкрэтнага адказу пакуль не атрымана. Эўрапейскі суд у пытаньнях правоў чалавека абавязаў Расею да 9 студзеня паведаміць, дзе знаходзіцца зьняволены актывіст.
Лідэр руху «За правы чалавека» Леў Панамароў сьцьвярджае, што 30 сьнежня тэлефанаваў начальніку службы выкананьня пакараньняў, і той заявіў, што сам ня ведае, дзе Дадзін.
У сацыяльных сетках неабыякавыя публікуюць допісы аб сытуацыі з хэштэгам #ГдеИльдарДадин, а жонка Дадзіна Анастасія Зотава лічыць дні, цягам якіх ня ведае пра лёс мужа.
Дадзін першы ў Расеі асуджаны паводле артыкулу «неаднаразовае парушэньне вызначанага парадку арганізацыі альбо правядзеньня мітынгаў», прызнаны Amnesty International вязьнем сумленьня. Перад зьнікненьнем ён у дэталях распавядаў СМІ пра жорсткія катаваньні ў калёніі.
