Пра гэта на брыфінгу ў Маскве 10 лістапада паведаміла афіцыйны прадстаўнік МЗС Расеі Марыя Захарава.
Раней замежныя грамадзяне свабодна перасякалі расейска-беларускую мяжу, не праходзячы пашпартнага кантролю.
«Аднак цяпер сытуацыя ў сьвеце кардынальна зьмянілася, рэзка ўзрасьлі рызыкі, зьвязаныя з тэрарыстычнымі, міграцыйнымі пытаньнямі», — сказала прадстаўніца расейскага МЗС.
Яна адзначыла, што на гэтым участку мяжы расейскія кампэтэнтныя органы рэгулярна затрымлівалі асобаў, «якія ня мелі падставаў для ўезду ў РФ і ўяўлялі пагрозу бясьпецы».
Паводле дыпляматкі, дзейнае заканадаўства прадугледжвае ўезд іншаземцаў на тэрыторыю Расеі толькі празь міжнародныя пункты пропуску.
«На расейска-беларускай дзяржаўнай мяжы міжнародныя пункты пропуску адсутнічаюць — у сувязі з гэтым памежны кантроль асобаў і транспартных сродкаў на гэтым участку дзяржаўнай мяжы не ажыцьцяўляецца. Такім чынам, няма падставаў для перасячэньня расейска-беларускай дзяржаўнай мяжы грамадзянамі трэціх краін. Да парушальнікаў могуць ужывацца санкцыі ў адпаведнасьці з расейскім заканадаўствам. Цяпер расейскімі ведамствамі вядзецца актыўная праца па пошуку выхаду з сытуацыі, якая склалася», — цытуе «РИА Новости» Захараву.
