Ушанаваньне памяці Алеся Чаркашына (псэўданім «Тарас») адбудзецца на могілках вёскі Камяніца Жыравецкая а 14-й гадзіне. Тут зьбяруцца бацькі, родныя ды сябры берасьцейца, які загінуў ва Ўкраіне.
Як сказаў Свабодзе блізкі сябар Алеся Андрэй Любянчук, чакаюцца госьці і зь іншых гарадоў Беларусі:
«Цікавяцца нават тыя, хто ня ведаў Алеся. Зьбіраюцца людзі зь іншых гарадоў Беларусі, цэлая дэлегацыя зь Менску. Помнік паставілі раней, але адкрыцьцё вырашылі рабіць пазьней, якраз на дзень народзінаў Алеся. Што тычыцца аўтарства помніка, то пакуль аўтар пажадаў застацца невядомым».
Пасьля ўшанаваньня памяці Алеся Чаркашына на могілках у плянах арганізатараў памінальная сустрэча і паказ дакумэнтальнага фільму пра яго.
«Гэта будзе перадпрэм’ерны паказ фільму, які зрабіў рэжысэр Антось Цялежнікаў для „Белсату“. Пакуль яго прэм’еры не было, але ёсьць згода на паказ у дзень ушанаваньня Алеся Чаркашына», — кажа Андрэй Любянчук.
Як распавёў Андрэй Любянчук, пакуль усёй сумы сродкаў на помнік не хапае, але колькі дакладна, стане вядома пазьней, пасьля таго, як прывязуць ахвяраваньні зь іншых гарадоў.
«На гэты момант прыйшло больш за чатыры тысячы даляраў ахвяраваньняў, але трэба амаль шэсьць», — кажа спадар Любянчук.
Андрэй Любянчук падзяліўся апісаньнем ідэі ад аўтара праекту помніка Алесю Чаркашыну:
«Стылістыка помніка Алесю Чаркашыну вынікае з трыяды: Бог, Бацькаўшчына, Служэньне. Гэта тры найважнейшыя грані жыцьця Алеся Чаркашына, пасьмяротна ўзнагароджанага ордэнам „Народны герой Украіны“ і ўшанаванага грамадзянскай супольнасьцю на Бацькаўшчыне.
Кампазыцыя вырашана нетрадыцыйна: у ёй крок за крокам апавядаецца аб прыярытэтах жыцьця, якое заўчасна абарвалася, але ня скончылася...
Вобразы кампазыцыі прамаўляюць проста: сьвяты Крыж, празь які можна ўбачыць неба альбо сьвятло пастаўленых паміж камянямі зьнічоў; у разарванасьці камянёў лёгка знайсьці падабенства з руінамі аэрапорта ў Данецку; наш нацыянальны сьцяг, якому прысягаў Алесь у юнацтве і ўзьнёс на баявых пазыцыях у Пясках. Каваныя птушкі, зробленыя з таго ж мэталу, што і зброя, якая забіла яго і тысячы іншых ахвяраў подлай вайны, падказаныя Алесем: „...сэрца птушкай засьпявала“.
Сумоўе Алеся з роднымі і суайчыньнікамі сьмерць не спыніла; ён і далей, ужо як вечны капэлян, пасылае кожнаму словы суцяшэньня: „Бог з табою, ты не адзін“. Нават выпадковыя мінакі спыняцца каля помніка, каб прачытаць словы зь ягоных вершаў, высечаныя на чорным камяні пад партрэтам Народнага Героя».
Былы старшыня берасьцейскай гарадзкой арганізацыі БХД Алесь Чаркашын ваяваў у складзе Добраахвотнага ўкраінскага корпусу «Правага сэктару» пад пазыўным «Тарас». 10 жніўня 2015 году ён быў цяжка паранены ў баі пад Белакаменкай на Данбасе і памёр у шпіталі ў Запарожжы пасьля некалькіх тыдняў комы.
Алесь быў пасьмяротна ўзнагароджаны ордэнам «Народны герой Украіны». Яму, ягонаму ўкраінскаму пабраціму Віталю Целіжэнку, а таксама беларусу Міхасю Жызьнеўскаму ў Кіеве ўстаноўлены мэмарыяльны знак.
Алесю Чаркашыну не было і 33 гадоў, калі ён загінуў.
