Былы першы намесьнік кіраўніка Службы бясьпекі Ўкраіны Віктар Гапака перадаў Нацыянальнаму антыкарупцыйнаму бюро Ўкраіны дакумэнты, якія пацьвярджаюць незаконныя выплаты Партыяй рэгіёнаў наяўных сродкаў шэрагу былых і цяперашніх высокапастаўленых чыноўнікаў, перадае УНІАН.
«Гэта вялікі масіў дакумэнтаў, якія пацьвярджаюць татальную карумпаванасьць улады — гаворыць Гапака. — Упершыню ў поле зроку праваахоўных органаў трапляе масіў матэрыялаў, якія датычаць не аднаго або некалькіх злачынстваў, а сыстэмнай шматгадовай карупцыйнай дзейнасьці арганізаванай структуры, якая дзейнічала на базе вядомай палітычнай партыі і мела мэтай незаконны захоп улады і яе супрацьпраўнае выкарыстаньне».
Паводле яго слоў, сярод фігурантаў гэтых матэрыялаў — службовыя асобы самага высокага ўзроўню, міністры і кіраўнікі ведамстваў, народныя дэпутаты, вядомыя палітыкі, грамадзкія дзеячы, прадстаўнікі міжнародных арганізацый, судзьдзі, у тым ліку вышэйшых судовых інстанцый.
Разам з тым, экс-намесьнік кіраўніка СБУ «у інтарэсах будучага сьледзтва» адмовіўся называць прозьвішчы чыноўнікаў і палітыкаў, якія фігуруюць у дакумэнтах, а таксама абставіны, пры якіх гэтыя людзі атрымлівалі грошы.
Аднак, са слоў Гапакі можна зразумець, што гаворка ідзе пра сьпіс паслуг, прадстаўленых Партыяй рэгіёнаў службовымі асобамі розных узроўняў, кожны з якіх атрымаў за гэта незаконнае грашовае ўзнагароджаньне.
