У судзе Цэнтральнага раёну Гомеля 19 студзеня адбылося папярэдняе слуханьне паводле пазову начальніка Лоеўскага раённага аддзелу міліцыі Ўладзімера Бухаўцова да журналіста-фрылансэра Кастуся Жукоўскага. Разгляд справы прызначаны на 29 сьнежня.
Падпалкоўнік міліцыі Бухаўцоў просіць суд прызнаць зьвесткі ў відэаматэрыялах Кастуся Жукоўскага, зьнятых для тэлеканалу «Белсат», а таксама разьмешчаных падчас выбараў у сацыяльнай сетцы, зьняважлівымі для ягонага гонару, годнасьці й дзелавой рэпутацыі ды спагнаць з фрылансэра 2000 рублёў у якасьці кампэнсацыі маральнай шкоды.
«Усё ёсьць у пазове. Думаю, што ў судзе мы разьбяромся. Прашу толькі ня ўмешвацца ў маё прыватнае жыцьцё», — неахвотна камэнтуе свой пазоў Уладзімер Бухаўцоў.
У пазове гаворка вядзецца пра дзеяньні лоеўскай міліцыі, паказаныя ў тым ліку й на тэлеканале «Белсат».
Згадваюцца відэасюжэты з Лоева пад назовам «Міліцыянты б’юць журналістаў, каб прыхаваць вынікі эканамічнага заняпаду» і «Будзённае жыцьцё рэгіёну Лоеў».
У апошнім зь іх, як сказана ў пазове, Жукоўскі задае пытаньні жыхарам Лоева, а ў кадры відаць надпіс: «МУС — гестапа». Заканчваецца сюжэт чырвоным колерам, мяняецца надпіс і фон назвы аддзелу ўнутраных справаў Лоеўскага райвыканкаму.
«Для мяне, унука пераможцаў фашызму — гэта маральная зьнявага», — піша лоеўскі міліцыянт.
Аспрэчвае Ўладзімер Бухаўцоў некаторыя заявы і відэасюжэты са сваім удзелам падчас агітацыйнай кампаніі кандыдата ў дэпутаты Палаты прадстаўнікоў Аляксея Атрошчанкі і яго даверанай асобы Кастуся Жукоўскага. І асабліва што да правядзеньня люстрацыі для міліцыянтаў.
Прысутны на судзе праваабаронца Леанід Судаленка заявіў, што зь вялікай заявы Ўладзімера Бухаўцова можна вылучыць два моманты — пра «гестапа» й «запалохваньне правядзеньнем люстрацыі».
«Трэба, аднак, мець на ўвазе, ці параўноўваў наагул Жукоўскі міліцыю з гестапа? Калі гэта адбылося ў той час, як міліцыянт у Лоеўскім аддзеле ўнутраных справаў з дапамогаю яшчэ двух супрацоўнікаў прыціскаў каленам галаву Жукоўскага да падлогі, то ў такім разе можна было і не такое пачуць. Бо наўрад ці Жукоўскі ў такім стане мог кантраляваць сябе. Варта найперш уважліва пазнаёміцца з прыкладзенымі да пазову відэаматэрыяламі і ўжо пасьля рабіць нейкія высновы», — лічыць праваабаронца.
Судзьдзя надала адказьніку магчымасьць пазнаёміцца з матэрыяламі справы, заплянаваўшы чарговае паседжаньне на 29 сьнежня.