«Божа!.. Вы мяне забілі...» — так адрэагавала кіраўніца бабруйскага клюбу «Спадарожнік» на навіну пра тое, што некалькіх былых выхаванцаў аднаго зь іхных гурткоў, грамадзка-патрыятычнага клюбу «Патрыёт», у тым ліку сына кіраўніка, вінавацяць у арганізацыі «лягера баевікоў».
Клюб «Спадарожнік», частка якога — клюб «Патрыёт»
Клюб «Патрыёт», былых сяброў якога Андрэя Дундукова, Яна Міхалькова сёньня затрымалі спэцслужбы й вінавацяць у арганізацыі «лягера баевікоў», — гэта адно з абʼяднаньняў у складзе клюбу па месцы жыхарства «Спадарожнік» пры бабруйскім Цэнтры творчасьці дзяцей і моладзі. Арганізаваўся «Патрыёт» у 2003 годзе, кіруе ім увесь час былы афіцэр Мікалай Міхалькоў.
— У Ленінскім раёне Бабруйску шэсьць падобных клюбаў, а з грамадзка-патрыятычнай скіраванасьцю — адзін наш «Патрыёт», гэта наша «разынка», — кажа пэдагог-арганізатар «Спадарожніка» Галіна Сіманава. — Хлопцы й дзяўчаты ў ім ня толькі займаюцца трэніроўкай свайго цела, яны вывучаюць гісторыю Беларусі, даглядаюць гістарычныя помнікі і помнікі тым, хто загінуў у войнах.
Чальцоў «Патрыёта» рэгулярна запрашаюць у дзіцячыя садкі Бабруйску правесьці гульню «Зарніца», паўдзельнічаць у гарадзкіх спартовых спаборніцтвах кшталту «Бабруйскай лыжні», дзе яны заўсёды займаюць прызавыя месцы. Удзельнічаюць яны і ў сустрэчах з вэтэранамі.
Летам клюб выяжджае ў перасоўны намётавы лягер «Брыганціна» ў лясы Бабруйскага й Асіповіцкага раёнаў, ладзіць паходы па гістарычных мясьцінах бабруйскага краю.
Пры клюбе дзейнічае й валянтэрскі атрад, які дапамагае пэнсіянэрам і вэтэранам па гаспадарцы. Валянтэры шчыльна супрацоўнічаюць з тэрытарыяльным Цэнтрам сацыяльнага забесьпячэньня насельніцтва, і туды на адрас «Патрыётаў» увесь час ідуць лісты падзякі ад вэтэранаў і пэнсіянэраў.
— Гэтыя старыя, — расказвае Галіна Сіманава, — потым кажуць пра нашых юнакоў: «Цудоўная моладзь! З вас вырастуць яшчэ лепшыя патрыёты, чым былі мы!»
Кажуць пра нашых юнакоў: «Цудоўная моладзь! З вас вырастуць яшчэ лепшыя патрыёты, чым былі мы!»
Адзін з частых гасьцей клюбу й ягоны падапечны, 90-гадовы вэтэран вайны, палкоўнік у адстаўцы Анатоль Кісь таксама сказаў Свабодзе: «Харошыя хлопцы. Я бачу ў іх цудоўных будучых пэдагогаў, генэралаў. І пэдагогі ў іх цудоўныя».
Дарэчы, практычна штогод выхаванцы клюбу «Патрыёт» паступаюць у лепшыя ВНУ краіны, у Вайсковую акадэмію ці Акадэмію МУС.
Заняткі ў клюбе ў асноўным праходзяць па-беларуску. Кіраўнік Мікалай Міхалькоў сам гаворыць па-беларуску і лічыць, што вучыць сваю гісторыю, прышчапляць любоў да радзімы лепш на сваёй мове. А яшчэ на імпрэзах Цэнтру творчасьці дзяцей і моладзі сябры клюбу ладзяць майстар-клясы па беларускіх сярэднявечных танцах.
— Часта чула ад бацькоў, што іх дзеці ў клюбе «Патрыёт» растуць сапраўднымі мужчынамі, — працягвае Галіна Сіманава. — Сюды шукаюць, пытаюцца, як уступіць. Прыходзяць і з праблемных семʼяў — а выходзяць не «адмарозкамі» а нармальнымі сурʼёзнымі людзьмі. Дый многія дзяўчаты імкнуцца ў клюб — і за сабой сачыць, і гісторыю вучыць, і старым дапамагаць. Хадзіць па гістарычных мясьцінах, гартаваць сілу й здароўе, вучыцца ўзаемавыручцы, павазе да старых і гісторыі — гэта якраз тое, што трэба маладому пакаленьню.
Усё гэта спадарыня Сіманава расказала, яшчэ ня ведаючы пра затрыманьні й абвінавачаньні. А даведаўшыся, доўга не магла даць веры.
— Паклаўшы руку на сэрца, заяўляю: у нас ніколі не было ані кроплі крыміналу! І беларуская мова — хіба гэта дрэнна? Гэта ж наша гісторыя, культура. У нас шмат мерапрыемстваў праходзіць па-беларуску.
Мэтадычная інфармацыя ў кабінэце клюбу «Спадарожнік»
Толькі за апошнія два месяцы ў гарадзкой прэсе выйшла некалькі матэрыялаў, наўпрост ці ўскосна прысьвечаных працы «Патрыёта» — з аднымі станоўчымі водгукамі. Апошні — усяго тыдзень таму. Гэта было інтэрвію зь яшчэ адным вэтэранам, колішнім партызанам Іванам Бычковым. І ён таксама перадае шмат падзяк патрыятычнаму клюбу, кажа, што там правільна любяць Радзіму.