12 сьнежня суд Маладзечанскага раёну пастанавіў, што пазоў бацькі загінулай на ўборцы бульбы школьніцы не падлягае задавальненьню. Паводле пастановы суду, дзяўчынка на поле не працавала, а выхоўвалася.
Як перадае Tut.by, cуд адмовіў у задавальненьні пазоўных патрабаваньняў бацькі школьніцы, а менавіта ў прызнаньні працоўных дачыненьняў паміж школьніцай і ААТ.
«Працоўных адносін паміж Папчэняй і ААТ не было», — зачытаў рашэньне судзьдзя Ігар Гарановіч.
На думку суду, даказаны той факт, што школьніца была адпраўленая на поле ў рамках вучэбна-выхаваўчага пляну СШ № 11 г. Маладзечна. Па сутнасьці дзяўчынка на поле не працавала, а выхоўвалася. Таму суд абавязаў аддзел адукацыі Маладзечанскага райвыканкаму правесьці спэцрасьсьледаваньне няшчаснага выпадку са сьмяротным вынікам школьніцы Вікторыі Папчэні і скласьці акт паводле вынікаў. Усё гэта будзе рабіцца на падставе Інструкцыі аб расьсьледаваньнi i ўлiку няшчасных выпадкаў з навучэнцамі і выхаванцамі.
Сям'я школьніцы заявіла, што мае намер абскардзіць рашэньне суду.
***
У судзе Маладзечанскага раёну разглядалі грамадзянскі пазоў бацькі школьніцы, што загінула на ўборцы бульбы ў СВК «Усход-Агра». Алег Папчэня прасіў устанавіць факт працоўных дачыненьняў паміж ягонай дачкой і арганізацыяй. У такім выпадку правесьці спэцыяльнае расьсьледаваньне здарэньня як няшчаснага выпадку на вытворчасьці павінен быў Дэпартамэнт дзяржінспэкцыі працы.
Першапачаткова адказчыкам у справе было ААТ «Усход-Агра» — прадпрыемства, на полі якога загінула дзяўчынка падчас уборкі ўраджаю.
У судзе высьветлілася, што спэцрасьсьледаваньне выпадку можа правесьці і аддзел адукацыі Маладзечанскага райвыканкаму. На пытаньне суду, чыёй дапамогай хацеў бы скарыстацца бацька, Алег Папчэня заявіў:
«Мне ўсё роўна, хто будзе праводзіць. Проста, як мне здаецца, выяўленыя ня ўсе факты. Ня ведаю, у каго якія паўнамоцтвы і хто як праводзіць праверку. Хацелася б, каб і Дэпартамэнт інспэкцыі працы, і аддзел адукацыі праводзілі расьсьледаваньне. Будзе добра параўнаць вынікі».
Раней упраўленьне адукацыі па Менскай вобласьці праводзіла ўласную службовую праверку інцыдэнту. Там прыйшлі да высновы, што працоўныя дачыненьні паміж школьніцай і ААТ усё ж былі, таму рэкамэндавалі аддзелу адукацыі ў Маладзечне зьвярнуцца па расьсьледаваньне няшчаснага выпадку ў інспэкцыю працы.
У выніку суд пастанавіў прыцягнуць у якасьці суадказчыка ў справе аддзел адукацыі Маладзечанскага райвыканкаму, а таксама Дэпартамэнт дзяржінспэкцыі працы.