Сьвінакомплекс на 100 тысяч галоў, які мелася пабудаваць кампанія «Велес-міт» каля вёскі Мойсічы, у трох кілямэтрах ад Маладэчна, пабудаваны ня будзе.
Пра гэта паведаміў Радыё Свабода першы намесьнік старшыні Маладэчанскага райвыканкама Генадзь Бажко.
Пляны пабудовы выклікалі шырокую рэакцыю ў грамадзтве. Супраць будаўніцтва сьвінакомплексаў сабралі некалькі сотняў подпісаў.
1 сьнежня ў Маладэчанскім райвыканкаме адбыліся грамадзкія слуханьні.
Your browser doesn’t support HTML5
Маладэчанцы супраць сьвінакомплексаў
Магчымасьць будаўніцтва другога сьвінакомплекса кампаніі «Велес-міт» на пляцоўцы каля вёскі Соўлава ў Маладэчанскім раёне разглядаецца.
Адным з ініцыятараў хвалі грамадзкага пратэсту супраць будаўніцтва сьвінакомплексаў стаў жыхар Валожынскага раёна Ўладзіслаў Юркоў. Ён жыве ў двух кілямэтрах ад меркаванай пабудовы комплексу ў раёне вёскі Соўлава:
«Я думаю, што мясцовыя ўлады прыслухаліся да грамадзкасьці. Мы спрабавалі данесьці свае меркаваньне пра тое, што будаўніцтва гэтых сьвінакомплексаў нас не задавальняе. На грамадзкіх слуханьнях 1 сьнежня 99,9% людзей былі супраць гэтага будаўніцтва. Думаю, што гэтая праблема шмат каго хвалюе ў Маладэчне — там жыць і начальству, і не начальству».
Уладзіслаў Юркоў паведаміў, што пад пэтыцыяй на сайце change.org супраць будаўніцтва абодвух сьвінакомплексаў падпісалася каля 5 тысяч чалавек. Яшчэ некалькі сотняў зваротаў разьмешчаныя праз рэсурс zvarot.by. Сярод аднавяскоўцаў і жыхароў суседніх вёсак удалося сабраць больш за сто подпісаў.
«Я спадзяюся, што яны гэтаксама прыслухаюцца да меркаваньня тых людзей, якія жывуць каля Соўлава, — кажа Ўладзіслаў. — Тут, канечне, жыве нашмат менш людзей, але гэта такія ж людзі, як і ў Маладэчне. У іх ёсьць дзеці, здароўе, мары, жаданьне жыць падалей ад гэтых сьвінакомплексаў. У кілямэтровую зону ад будучай пабудовы ўваходзяць вёскі Рудзеншчына, Высокае, Ленкаўшчына. Шмат вёсак уваходзіць у двухкілямэтровую зону. У адпаведнасьці з рэспубліканскімі нормамі так ня мусіць быць. Мы спадзяемся, што калі такія комплексы будуць пабудаваныя, то ў адпаведнасьці з прынятымі нормамі».