Прэзэнтацыя новай кнігі празаіка Альгерда Бахарэвіча “Праклятыя госьці сталіцы” адбылася ў музэі Гісторыі беларускай літаратуры ў Менску.
Новы твор Альгерда Бахарэвіча – раман у васьмі частках, які выйшаў у выдавецтве Ігара Логвінава. У часе прэзэнтацыі апроч аўтара выступілі паэты Андрэй Хадановіч, Марыйка Мартысевіч, Вольга Гапеева і Віка Трэнас. Дзеля прэзэнтацыі Альгерд Бахарэвіч прыехаў адмыслова зь Нямеччыны, дзе цяпер стала жыве.
На вокладцы кніжкі годам выданьня пазначаны 2008-ы. Пакуль мала хто чытаў “Праклятых гасьцей сталіцы”, таму найперш слова для самапрэзэнтацыі аўтару – Альгерду Бахарэвічу:
“Гэта мая першая спроба раману. Тэатральны раман. Як і ўсе мае кнігі, яна шматузроўневая, шматслойная, ёсьць некалькі асобных сюжэтаў. Што да зьместу, нічога сказаць не магу. Бо я быў бы занадта кепскім пісьменьнікам, калі б мог адным-двума сказамі сказаць, пра што кніга. Яна, напэўна, больш крытычная ў параўнаньні з астатнімі маімі кнігамі. Бо тут вельмі пазнавальная беларуская рэчаіснасьць. У тым ліку і палітычная беларуская рэчаіснасьць”.
Адным зь першых чытачоў “Праклятых гасьцей сталіцы” стаўся Юрась Барысевіч – рэдактар кнігі:
“Вельмі сучасная, экспэрымэнтальная, але разам з тым чытэльная проза. Дзеяньне адбываецца ў Менску, хоць месца канкрэтна не называецца. Але можна ўгадаць: кінатэатар “Зьмена”, музэй Пятруся Броўкі ды іншыя беларускія рэаліі.
Альгерд неяк прызнаўся, што да напісаньня гэтага раману яго падштурхнула ў тым ліку мая думка: усе мастакі выстаўляюць свае творы. А ці змог бы хто-небудзь выставіць не свае творы, а гледачоў? У прынцыпе, асноўная сюжэтная лінія новай кнігі Бахарэвіча вакол гэтай ідэі і разгортваецца”.
“Праклятыя госьці сталіцы” выйшлі з друку напрыканцы 2007 году, але сам твор быў напісаны у 2004-2005 гадах. Сёлета Альгерд Бахарэвіч паставіў кропку ў напісаньні новай кніжкі прозы – пад назвай “Сарока на шыбеніцы”.
Прэзэнтацыя “Праклятых гасьцей сталіцы” мела працягам пэрформанс “Тэатру псыхічнай неўраўнаважанасьці” на чале зь Ільлём Сінам, які ладзіўся пад акампанэмэнт струннай музыкі.