Міхал Стэльмак, Менск Сёньня Вышэйшы гаспадарчы суд адмовіў у скарзе на ліквідацыю недзяржаўнага прадпрыемства “Прэс-сэрвіс” – заснавальніка і выдаўца газэты “Курьер из Борисова”.
Суд прызнаў абгрунтаванай ініцыятыву Менскага аблвыканкаму, чый пазоў у дачыненьні да “Прэс-сэрвісу” у жніўні задаволіў гаспадарчы суд Менскай вобласьці. У сувязі з абвешчанай ліквідацыяй заснавальніка спыніла выхад і папулярная ў Барысаве газэта. Прадстаўнікі “Прэс-сэрвісу” і “Курьеру из Борисова” лічаць сёньняшняе рашэньне Вышэйшага гаспадарчага суду палітычна матываваным, зьвязаным зь перасьледам у Беларусі недзяржаўных СМІ.