80 кілямэтраў на ровары — на прэзэнтацыю “Імёнаў Свабоды”

Радыё Свабода Увесь гэты тыдзень пісьменьнік, гісторык і публіцыст Уладзімер Арлоў сустракаўся з чытачамі Полацку й Наваполацку. Ён прэзэнтаваў землякам сваю новую кніжку “Імёны Свабоды”. Пісьменьнік плянуе зладзіць такія прэзэнтацыі ва ўсіх шасьцёх абласьцях краіны.

Пісьменьніку, які нарадзіўся і вырас у Полацку, вядомаму папулярызатару гісторыі Полацкай зямлі, даводзіцца сустракацца з чытачамі ў напаўлегальных умовах.

Спробы даць абвестку пра плянаваныя сустрэчы з чытачамі ня мелі посьпеху. Аднак нягледзячы на гэта людзей на прэзэнтацыі прыходзіць шмат, і памяшканьні ня здольныя зьмясьціць усіх, хто хоча сустрэцца з аўтарам “беларускай гісторыі ў асобах”.

Каб патрапіць на прэзэнтацыю, мэдык з Дрысы (Верхнядзьвінску) Пятро Квяцінскі праехаў на ровары восемдзесят кілямэтраў.

Учора Ўладзімер Арлоў прэзэнтаваў сваю кнігу жыхарам Росіцы — вёскі на самай мяжы з Латвіяй.

Паводле пісьменьніка, ён ня мог абмінуць гэтай мясьціны, бо тут прынялі пакутніцкую сьмерць айцы-марыяне Антоні Ляшчэвіч ды Юры Кашыра, тут жыла сястра эўхарыстка Апалёнія Пяткун, якую вернікі называюць беларускай Маці Тэрэзай.

Нататку пра Апалёнію Пяткун з кнігі “Імёны Свабоды” прачытала на прэзэнтацыі пісьменьніца Ірэна Жарнасек. Яна зрабіла гэта на просьбу аўтара. Паводле Ўладзімера Арлова, спадарыня Ірэна забясьпечыла яго дакумэнтальнымі матэрыяламі пра герояў кнігі — тых, што служылі Богу і Беларусі.

На сустрэчы ў Наваполацку па аўтограф да аўтара стаяла вялізная чарга

Падчас прэзэнтацыі ў Полацку зьнянацку пагасла сьвятло. Сустрэча з чытачамі працягвалася пры запаленых васкоўках і пераносных ліхтарах

Полацкія чытачы закідалі аўтара пытаньнямі

Прэзэнтацыя “Імёнаў Свабоды” ў Росіцы